Cui sono?

In cinc a rivin de provincie di Pordenon, stes numar di chê di Udin. Un al è dal Gurizan. De ricercje incrosade jenfri facebook, twitter e linkedIn, o sin rivâts a cognossi alc di plui dai 11 candidâts al Parlament furlan: che a son 9 oms e 2 feminis. Pal plui zovins under 40 agns. Fûr liste, il lôr leader, Adriano Biason. Musis frescjis de politiche (in 4 a àn declarât une partignince, tal lôr pedigree) e dal sigûr studiadis (in 8 a son laureâts o iscrits a un ateneu). Ma no ducj a àn butât ju un intindiment clâr, un program cun obietîfs vêrs. “Res publiche furlane” e à al moment siet circui sul teritori.
Dal Cjaroç a saltin jù (o forsit a continuaran a restâ?): Stefano Mattiussi, pluri-laureât, speaker nuie di mancul che di Radio Padania, oltri che membri dal diretîf di Gurize e za sentât tal Cda di Insiel. Al propon un program fat di 16 ponts: dal tornâ a meti lis doganis, ae valorizazion de lenghe furlane, dal control de emigrazion, a un gnûf implant economic. Loris Cao, cjâfgrup de Leghe in consei a Cjanive, lauree in inzegnerie ambientâl, vuê al lavore tune aziende di Sacîl e al scrîf une frase lapidarie: “La autonomie e ven concedude, la indipendence si concuiste”. E po Sabrina Pivetta, di Daçan, militant de LN fintremai al 2013, di profession assistente aministrative in diviersis scuelis, passionade di fitness, tesi di lauree su Quargnûl. Si bat pe indipendence par “consegnâ aes gnovis gjenerazions un teritori gnûf e fuart de proprie tradizion cultural e tal stes timp, ae avanguardie”.
Esperience politiche declarade ancje par Gianni Sartor, saltât dal grim dal Maf di Valeria Grillo a chel di “Un’altra Regione” dal triestin Franco Bandelli. Su la sô pagjine – candidature al tone dome un “Vonde!”. De cause tibetane al varà cjapât ispirazion Alessandro Groppo Conte, comès intune librarie di Udin, membri atîf de Associazion “Italia-Tibet” (par judâ il Guvier in esili a otignî la indipendence): “Di bessôi. Parcè che no je robe miôr di jessi parons a cjase nestre!”. Il zovin Gian Carlo Cesarin di Cjasarse al è za co-fondatôr e “business strategy manager” di une start-up alì di Friûl Innovazion, che al à ancjemò di laureâsi in inzegnerie gjestionâl. Intun lunc e articolât resonament al spieghe che “dopo agns di riflessions e di studis, o ai capît che la uniche robe che e mancje a chest bielissim ma inesprès cjanton di mont, clamât Patrie dal Friûl, e je la Libertât”.
Ranero Bertolucci, master in marketing e cumierç internazionâl, che al lavore li de Fondazione Istituto Italiano di Tecnologia, al fevele di motivazions su doi plans: identitât di popul e fatôr economic. Ma al è su chest ultin che al ponte di plui; l’obietîf “al è creâ une economie largje e eterogjenie par clamâ dongje impresis dal forest, cuntune fiscalitât agjevolade e costrutive” e che “no fasin concorince aes nestris aziendis”.
Par infin, oltri a Marco Serafin, che o vin intervistât su chest sfuei, in corse ae elezion dal Parlament furlan a son ancje Fabio Brusini, operadôr tal setôr privât; Simone Nespolo, espert di programazion neuro-linguistiche, membri dal board dal International Centre for Mechanical Sciences di Udine e de Comission Paritât Om Femine de Provincie di Udin; Jessica Della Via, 22 agns, tifose dal Udin, che i plâs lei, viazâ, lis lenghis e la nature. ❚
Oscar Puntel