Une propueste pal assessôr Pirone su la memorie de Prime Guere Mondiâl

Se no fos une gnove dimostrazion di ce che al conte Udin denant des sieltis de zonte regjonâl, o sarès une vore content parcè che no son rivâts i bêçs al Comun pai progjets su la prime vuere mondiâl. O disarai di plui: par une volte no cjacararai mâl dai triestins. No jentri tes propuestis che la comission culturâl citadine e veve fat, no mi interesse plui di tant, ancje se mi someavin, par dîle dute, tiradis sù tal ultin e cence tante fadie. Se si ves volût jentrâ, ancje cuntune vision ideologjiche sul argoment, tantis a podevin jessi lis oportunitâts. O crôt che invezit la ideologjie di çampe e vedi zuiât une matane al Comun, cu la ricercje di alc che nol lave te celebrazion, ma i zirave tor ator.
Une sielte a metât, duncje.
E je stade la dimostrazion clare e nete di ce che si veve dit noaltris sul imprin: la çampe no varès vût il spirt di frontâ la cuistion se no dome in non di un gjeneric pacifisim.
O ai une propueste pal Assessôr ae culture Pirone, responsabil de comission: Cjâr Assessor, pe fin dal an, ti metìn a disposizion, gratis, ducj i articui de Cuintristorie curade dal professôr Agnul Floramo, publicâts su chest gjornâl. No crôt che nissune comission regjonâl a podedi dubitâ de cualitât e professionalitât dal autôr. Noaltris ti din i tescj e il Comun al publiche un libri di mandâ a ducj i students des superiôrs in citât. Pocje spese, tant jutori a fâ clarece e no retoriche tal cjâf dai zovins.
Dome une condizion: il titul al à di restâ il nestri “1914-2014 il centenari des bausiis e de vergogne”. ❚
✒ L’om di Buri