Risorsis e servizis gnûfs sul sît de ARLeF

Tal pustot dal imobilisim e dal disinterès de politiche su dut ce che al inten la ultime reson di specialitât de nestre Regjon, ven a stâi il plurilinguisim, la Agjenzie Regjonâl pe Lenghe Furlane nus confuarte un pôc insiorant il so sît internet www.arlef.it.
Plui pagjinis che a pontin ae multimedialitât, par fâ viodi e sintî la vitalitât di une lenghe vive. Si slargje ancje la ufierte pai ents locâi, indreçade soredut aes traduzions.
A son stadis zontadis pagjinis dulà che si puedin scoltâ cjançons par furlan che a van dal pop, al rock, ae musiche tradizionâl, eletroniche, ae cjançon di autôr o ancje intervistis. Te sezion “Video” a son siet categoriis cun produzions cinematografichis e servizis su culture, sport, didatiche de marilenghe e v.i. Si à pensât ancje ai fruts cuntune sezion di pueste siore di materiâl didatic cetant util tant che supuart al insegnament de marilenghe ai plui piçui.
Il portâl de Arlef, curât pe part tecniche e grafiche de agjenzie udinese direWeb, al jere za un biel esempli di presince dal furlan su la Rêt, cun pagjinis dinamichis e une grafiche moderne, tant che za l’an passât tal nestri sfuei o vevin contât de vincite di premis impuartants tal setôr dal web.
Dut câs, vie dal portâl, la Agjenzie e à ancje une pagjine su Facebook e une su Twitter, i social network plui bocons e doprâts. La presince su chescj sîts e je tignude tant che impuartante e, par chest, inzornaments a ‘nd è ogni dì. Lis gnovis e i leams publicâts a integnin chês altris comunitâts nazionâls e linguistichis cence stât ator pal mont.
Il president dal ent, Lorenzo Fabbro, al è sigûr che chescj canâi a sedin vuê i plui adats par promovi la nestre lenghe, te sperance di rivâ a tirâ dongje materiâi utii e interessants che, par solit, si fâs fature a cjatâ. Par chest al è stât domandât materiâl che al jere za pront sei al Ateneu furlan che a produtôrs indipendents e associazions. Dut il materiâl cjariât al è compagnât di une schede cun informazions sui contignûts pai utents. Cul mês di Setembar si zontarà ancje une sezion specifiche  dedicade ai neogjenitôrs, cun scrits, video e un blog gjestît di une esperte tal cjamp dal bilinguisim. ❚
✒ Michele Calligaris