EDITORIÂL – Une gnove sentinele di Italie al puest de nestre autonomie

✽✽ O ai cjatât stampât pardut un sproc di Albert Einstein su la crisi, dulà che al è scrit cemût che un moment dificil al pues voltâsi in miôr. O ai viodute cheste scrite stampade su lis maiutis, su poster in dutis lis libreriis, fintremai sui tovaiuts di cjarte par netâsi la bocje. O ai pensât che un sucès dal gjenar al podeve vignî dome di une sperance di tancj di lôr di saltâ fûr in cualchi maniere de situazion di vuê.
✽✽ Soredut dulà che il nestri al dîs: “Al è te crisi che si scree la inventive, lis scuviertis e lis grandis strategjiis”.
✽✽ Juste, e no ai podût fâ di mancul di pensâ al nestri Friûl dulà che si fevele de crisi bielzà di agns e dulà che lis rispuestis a van in dute altre direzion.
✽✽ In chei dîs achì, par un esempli, si à tornat a fevelâ de Safilo par vie che il president de provincie di Udin Fontanini al à ricuardât come un scufiot aes operariis licenziadis, la fieste de aziende al Guggenheim di Vignesie. A son plui di 500 lis feminis che a àn pierdût il puest di vore a Prissinins e Martignà tal 2009.
✽✽ Al fo il prin segnâl de buriane. Di bande de zonte regjonâl di Tondo, assessôr Ciriani, tantis peraulis e dâ dongje ae casse integrazion il plui pussibil. Strategjie? Nissune. Risultât che i bêçs a finissin daurman e vuê chês feminis a son dutis a cjase. E di chê volte, no dome lôr.
✽✽ Cu la Serracchiani al cambie pôc e i numars che Muradore, segretari provinciâl de Cisl di Udin, al fâs viodi su chestis pagjinis a dimostrin cun clarece che la situazion e je grivie. La sielte dal so guvier no je struturâl, ma pluitost di architeture istituzionâl, dulà che lis dôs riformis fuartis, sanitât e comuns e provinciis, no rispundin ae domande “par fâ ce?”, ma a une vision ideologjiche e cheste no fâs il ben dal Friûl.
✽✽ Daûr, e dite simpri plui clâr, al ven chest: “De autonomie de specialitât a chê de responsabilitât”. Chest il titul de cunvigne metude adun a Triest cui dirigjents locâi e talians dal Pd e de Cgil.
✽✽ Ce vuelial dî? Che a àn decidut di doprâ la crisi par cambiâ muse no dome al Friûl, ma ancje ae Region, viodude no plui tant che un teritori cuntun so specific politic e uman, ma pluitost un lûc dulà fâ esperiments par Rome. Une gnove sentinele di Italie che tant i plaseve a Mussolini.
Invezit di lâ indenant si va indaûr. La inventive di Einstein e devente par noaltris furlans un vencul. ❚
DREE VALCIC