Politiche e identitât tal gnûf libri di Giorgio Cavallo

“Ripensare la Nazione. Dall’agonia dello Stato repubblicano a un nuovo percorso per il Friuli di domani” al è il titul dal gnûf libri di Giorgio Cavallo, bielzà conseîr regjonâl par 15 agns e assessôr tal Comun di Udin par 10 agns: tresinte pagjinis publicadis a sôs spesis scritis par talian ma pensadis par furlan par ufrî un “tentatîf di leture politiche de cuistion furlane intindude come il mai risolt rapuart tra il Friûl – te sô complessitât gjeografiche, storiche e linguistiche – e lis diferentis formis che al à cjapât il Stât talian”.
Un dai trois pal Friûl di doman, si lu cjate ipotizât a pagjine 279: “Se il Friûl al intint di pensâ a un so doman che nol sedi dome chel di vie di transit in funzion, plui o mancul util, dal Stât talian, al varà di fâsi caric ancje di Triest, cjapant sù lis oportunitâts, magari cirint di favorî la concretece e judant a sfantâsi lis ideologjiis di supremazie e di un assistenzialissim che si scugne. Par ricevi indaûr une fuarce in plui par une ridefinizion istituzionâl cun significatîfs podês par dut il teritori regjonâl”. Cun cuale logjiche? “Un pôc mancul taliane e un pôc plui europeane”.
Nol convente pratindi che Triest al torni a fevelâ par furlan, al continue Cavallo, “ma a fâ i conts tal insieme de diviersitât dal Friûl di vuê sopuartâ e supuartâ Triest al pues valê la pene”.
Plui in gjenerâl cheste gnove publicazion e rive a 35 agns dal volum “La Nazione Friuli” che tal 1980 a scriverin Cavallo dutun cun Pier Carli Begot e Andrian Cescje e intint di “ripensâ a cualchidun dai elements di fonde de cuistion furlane dal dì di vuê”.
La tesi di fonde dal libri, al spieghe l’autôr, “e je che il Friûl al è un spazi gjeografic plurilinguistic, dulà che e vîf la nazion linguistiche furlane che cumò e à di viodi in ce forme organizâsi cun elements istituzionâi e politics biel che si è in timps di decadence politiche”.
Che anzit, une dai sburts plui fuarts a fâ saltâ fûr i siei pinsîrs Cavallo lu à vût propit di chescj agns dulà che si pant a clâr une “pierdite di sovranitât dal stât nazionâl” a pro di une realtât sore statâl, come chê europeane. “Il cicli storic dal stât nazionâl al è finît”, al sosten l’autôr e pal “Friûl al è timp di lascâ i leams cu la Italie e impegnâsi te costruzion di spazis politichis sorestatâi a gjeometrie variabile”. Slovenie, Austrie, Cravuazie i interlocutôrs privilegjâts intune Europe dai popui e des regjons, ben savint che “cun Slovenie e Cravuazie ancjemò il discors nol sarà facil par vie che alì al è ancjemò vivarôs il mît dal stât nazionâl”. Dut câs, seont Cavallo la prospetive dal doman e je chê: mancul Italie e plui Europe (par esempli “Gurize no à doman se no devente une citât uniche” cun Nova Gorica) intun procès di “destruturazion dal sistem istituzionâl”.
Intant cjalant indaûr, tal spazi storic tra il libri dal 1980 e chel di cumò, “istituzionalmentri no si è vuadagnât nuie”, al dîs sevêr. “L’unic fat gnûf e je la struturazion de lenghe furlane e il sô ricognossiment, fats che cumò nissun nol pues contestâ”. Te analisi dal ex aministradôr ce che invezit al è lât simpri almancul a “son i imprescj economics” par dâi fuarce al teritori. A coventin “podês regjonâi par podê decidi su diferents temis. Dute la struture identitarie bisugnarès vê il podê di gjestîle localmentri”.
Nol è un libri di memoriis, ma di politiche e di teoretiche politiche: la prime part e da un incuadrament storic politic de cuistion furlane; la seconde e cîr di costruî une teorie complessive su la cuistion furlane inzornantle; la tierce e smire un spazi di prospetive politiche e un program di lavôr par dâ rispueste aes domandis de cuistion furlane. ❚
✒ Antonella Lanfrit