I dissendents dai emigrâts in visite in Friûl

Il plui braurôs al si è fat tatuâ su pe schene une acuile. E al dîs: “Jo chest puest, il Friûl, lu sint me, i volarès vivi e lavorâ achì”. La manifestazion estetiche di trop che i ten, le à palesade cussì: un dissen su la piel. Gabriel Visintin, 31 agns, fotograf di Colonia Caroya, Argjentine, al è un dai 12 fantats – ducj dissendents di nestris emigrâts – rivâts a Udin par seguî la cuinte edizion dal cors di perfezionament “Valôrs identitaris e imprenditorialitât” (Lu organize l’ateneu cul jutori dal Ente Friuli nel Mondo F-VJ). Il zovin al è il cjâf-grup (morâl) dal trop, pal plui componût di siei conazionâi (9); chei altris 3 a son brasilians. Un colp di telefon e l’apontament al è li de Cjase dal Student di viâl Ongjarie, dulà che a son logâts.
A son zovins che a rivin catapultâts intun Friûl che a àn dome scoltât, sintût a dî, salacor viodût in cualchi cartuline. Une furlanetât “di ripuart” o che e passe dome pai lôr cognons. In chei Londero, Toso, Puntel, Visintin li che si lei la storie de emigrazion viers la Americhe Latine. Ma ce che al è restât, vuê, di chê epopee e ce che al è restât di che idee di Friûl rivade traviers dai lôr vons, al è avonde pôc. E chel pôc, stuart di folclôr, di gastronomie o di un “pastiche” talianot. Sparide la marilenghe, par esempli: nissun dai cuatri zovins che o incuintri la fevele, fûr che cualchi peraule o frasute. Nilce Gregoret, 24 agns, inzegnîr ambientâl di Avellaneda, Santa Fè, Argentina, strabasavone di Sagrât, lu dîs: “O soi simpri lade al Fogolâr Furlan e par me Friûl al jere il bal, i cjants, il mangjâ “crostul” (chest lu dîs propri par furlan). Jo no vevi un concet che al corispuindès al vêr di chest puest. Par me e je stade dute une novitât e une biele scuvierte. In prin, sul mût di lavorâ. La serietât, il sens de professionalitât, de voie di fâ, la pussibilitât di organizazion in cooperativis che o ai cjatât chi al è alc che al samee cetant a ce che o vin in Argjentine. Po il paisaç. Par me il Friûl al è mont, mâr, culinis, dut un, dut dongje. La bielece di un paisaç”. Romina Venica, 26 agns, fisioterapiste, strabasavon di Dolegne, ancje jê di Avellaneda: “Ancje jo no vevi propite nissune idee di Friûl, stant che nancje no lavi al Fogolâr, se no tai ultins timps. Mi à colpît cetant il fat che al è un puest piçul, dulà che si à dut, su lis curtis distancis. Li di nô, si à invezit di percori chilometris e chilometris par lâ di une bande a chê altre. Il cors che stin fassint ae Universitât nus à judât a capî alc di plui su la storie e la culture di chescj puescj, lenghe e tradizions di cheste int che po e je la nestre int”. La zovine e je in stage al Gervasutta, maraveade de tecnologjiis e di metodologjiis di riabilitazion che no veve mai viodût. Gregoret invezit e passe part di cheste esperience ae Net: “I miei coleghis – nus à confidât – mi àn dite: Va là e impare cemût che a gjestissin lis scovacis. E jo lu ai fat!”.
Altre storie e je chê di doi zovins, che a rivin di Colonia Caroya, il paîs fondât dai furlans. Gabriel Visintin, chel dal tatuaç, al cjate subit un alc in comun cun cheste tiere: il caratar, il mût di fâ. Chest Friûl si lu spietave cussì, cun cheste int. E cussì lu à cjatât. “Po dopo la idee gjeografiche dal puest e jere dal dut sbaliade. In cjase mi fevelavin dome di monts, monts, monts. Jo mi spietavi un puest di mont. O soi lât a viodi i paîs dai miei strabasavons, Parteulis e Cividât. E o ai scuviert di bessôl di trop pôc che o cognossevi cheste tiere. Noaltris a Colonya Caroya o sintìn un fuart leam cu lis nestris origjins, o volìn scuvierzi, cognossi. I tignìn cetant”. Visintin si fermarà chi di nô plui dai compagns, par viodi se al rive a cjatâsi un lavôr. Al moment al è in stage ae Solari. Il zovin al è parint di Maximilian Pez, architet, 31 agns, che al ven di Jesus Maria. Ju lee Cividât e il von “Lauret”. Il periodi di tirocini lu sta passant intun studi di architeture di Udin: “Jo il Friûl lu viôt tant che un puest cosmopolite. Di ce che o ai constatât, la int ti jude, se tu âs dibisugne e je vierte. Dut diviers di ce che o pensavi sul inprin”.
Ae fin de tabaiade o olsi: ma i brasilians? Dulà sono? A rispuindin in coro: “Chei a son simpri ator. Ur plâs il Cittafiera”. ❚
Oscar Puntel