TERITORI – La domande par une rapresentance unitarie dai slovens in Carinzie

Daspò dai ultins risultâts che a mostrin une diestre infuartide (massime il partît di Haider), il partît popolâr e chel di Haider a àn cjapât insieme plui di metât dai vôts (in totâl 65%).
Lis organizazions dai slovens a pandin il lôr marum e il discontent. Però si à di dâur la colpe ancje a lôr stes che no molin di lâ daûr ae tradizion di jessi disunîts.
Il Consei dai Slovens di Carinzie (NSKS) al fevele di un svilup disastrôs. I rapresentants de minorance slovene a son dacuardi almancul sul fat che si vedi di cjatâ gnûfs concets. „O vin di cjatâ svelts une rispueste juste a chest risultât eletorâl che nus profete une burascjade avierse», cussì il gnûf president dal NSKS Grilc. Ancje la Aleance des organizazions slovenis (ZSO), come pûr la Comunitât dai slovens carinzians (SKS), a son prontis a fâ pas concrets.
In rie pes balotazions carinzianis tant che tes votazions pal guvier di Viene al jere dome un partît politic dai slovens, la Liste Unitarie (Enotna Lista EL). E je stade penose massime la pierdite di sosten tai cjistiei dal moviment politic sloven te regjon tor di Eisenkappel/Železna Kapla e Bleiburg/Pliberk. Il president Vladimir Smrtnik al voleve dâ lis sôs dimissions za subit dopo i risultâts negatîfs.
Pal secont turni si son confrontâts i candidâts pal puest di sindic in 37 comuns. Framieç di lôr si à votât ancje in cinc comuns bilengâi. Pe prime volte un candidât de Liste Unitarie slovene al cjape il puest di sindic, un sucès storic sigurât di Franc-Jožef Smrtnik che al è deventât il sindic di Železna Kapla/Eisenkappel. Trê agns indaûr al veve riclamade la atenzion ancje dai uficis di Viene cuant che si jere peât par proteste a un cartel bilengâl.
Janez Erat