MUSICHE. Loris Vescovo al torne cun Penisolâti

Lu vin spietât a lunc e biadelore al è rivât. Si clame Penisolâti il gnûf lavôr di Loris Vescovo, vignût fûr pe etichete Nota cu la distribuzion di Egea. A son passâts 5 agns di Borderline,finalist al premi Tenco 2009, ma il spietâ nol è stât par dibant. Cheste volte il “Vescul” nus puarte adalt, intun svol dulà che la tiere, la realtât e la cussience a son une vore lontans. Come intes fotografiis satelitars de mari tiere che a componin lis 28 pagjinis dal librut che al ven insiemit cul disc. «Ducj i personaçs che o conti (e jo o soi dal sigûr un di lôr) a son daûr a galegjâ sospindûts e leâts a alc di plui grant, un cordon ombelicâl» al dîs. Di mistîr Loris al è ricercjadôr tal cjamp ambientâl e al è stât 7 mês in Gnove Zelande par lavôr: «Al è un dai puescj plui isolâts tal mont, e chest si pues ancje viodi cjalant la int» al conte «cuant che o soi tornât in Italie o soi lât indenant a cjalâ e o ai notât che, ancje se o sin circondâts di altris paîs, tai ultins agns mi somee di vivi intun paîs dismenteât dal Pacific, jenfri Tonga, Samoa e Hawaii». Al è nassût cussì Penisolâti, par chê sensazion di sintîsi isolâts ma picjâts ae tiere tal stes timp, come lis lagunis di Grau o di Vignesie. Il cjantautôr nus mene vie lontan su la sô barcje, de Gjiviane in Cjargne ae Ucraìne, passant pal Danau fint al Mâr Neri. Tant che il barcjarûl dal toc Barcarolo, nus incjante e nus rapìs intun viaç cence tiere sot ai pîts: cussì intal cjamin o cjatìn lis BenAndanti (badanti e benandanti), cui voi neris, muse blancje e dincj di arint, feminis soldatis vuardianis di dute la int. I “isolans” de Val Resie, cu la lôr lenghe paleoslave e i lôr suns antîcs di citira e bunkula. E po africans, magrebins, cjamesis neris, vedrans (jessi bessôi al è sâl, ma bessôi però) e oms che ti clamin copari cu la tiere su pai bregons. Insiemit cun Vescovo o cjatìn ancjemò une volte Leo Virgili (trombon e ghitare eletriche) e Simone Serafini (liron) e poi Mark Harris al piano e Ivan Ciccarelli aes percussions (ma no dome: a son ancje la vôs di Claudia Grimaz, il violin di Giulio Venier e tancj altris). Chest disc al à dentri nostalgjie e universalitât, amarece e suadence, traspuart e distac. E al è za li che al clame il prossim premi Tenco. ❚
✒ Natascia Gargano