Autonomie: Resurezion o De profundis?

Par fâ su une cjase bisugne partî dal bas e des fondis, se lis fondis a son buinis la cjase e stâ su, par cuintri e cole ju come inte flabe dai trê purcituts, la prime e je colade cuntune soflade dal lôf e la ultime e je restade in pîts e salacor e je ancjemò su di cualchi bande.
Ai 25 di Mai cirche trê cuarts dai Comuns dal Friûl a son lâts a votâ par vê un gnûf Sindic. No ai voie di jentrâ tai numars e intes percentuâls dai votos, invezit mi interesse di cjalâ par ben un altri aspiet des votazions. In tancj Comuns dal Friûl o ai viodût che a jerin presintis tantis listis che a pandevin une direzion autonomiste e furlaniste, un numar di listis e candidâts che prime di vuê no vevi viodût.
Cualchidun di lôr al è stât elet, cualchidun altri al à pierdût ma il risultât nol è cumò cetant impuartant, la robe impuartante secont me e je stade la presince, e chescj si puedin considerâ come tancj piçui modons e tancj piçui muradôrs che a àn lavorât inte cjase de Autonomie.
Un an indaûr invezit intes elezions regjonâls, forsit chês plui impuartantis par noaltris, no jere presinte nissune vere liste indipendente e autonomiste. Sul imprin a son stâts tancj i moviments che si son metûts in vore, ma a àn costruide une cjase in premure e cence un bon progjet, e chê cjase e je di fat colade ae prime soflade dal lôf (triestin o furlan che al sedi stât al è ancjemò di sclarî par ben).
La tradizion e vûl che cualchi mês prime des votazion a saltin fûr a fâsi viodi i autonomiscj di profession cu lis lôr ideis e po dopo des votazions, che cun regolaritât a van a finî mâl, a tornin in letarc fint aes prossimis consultazions. Di fat la presince furlaniste e/o autonomiste in Regjon nissun la ricuarde plui. Nol è pussibil che intune Regjon che si definìs autonome no sedi mai presinte une fuarce politiche che e pensi cul propit cjâf e in favôr dal propri teritori.
Il purcitut nus insegne che bisugne partî di lontan par podê fâ lis robis par ben e se il Friûl al à voie di vê alc, forsit e je rivade la ore di meti adun un bon progjet di costruzion. A mancjin cuatri agns pes prossimis regjonâls, a son tancj ma il timp al passe di corse, e se e je vere che i modons e i muradôrs che si son viodûts sparniçâts pal Friûl a rivassin a cjatâsi e a fevelâsi si podarès viodi la nassite di une imprese edilizie cun denant il timp necessari par tirâ su no dome une cjase, ma ancje un palaç, e partint dal bas e dal teritori. Lis ocasion a son di cjapâ cuant che a passin e in chestis ultimis elezions i segnâi, ancje se a jerin piçui, si son mostrâts.
Forsit chescj a son discors za fats, forsit cualchidun si stiçarà e si sintarà acusât di no vê fat avonde, ma une robe secont me e je avonde clare, o ben che i timps a son cambiâts, che lis personis a son cambiadis, che cumò si presentin devant di nô gnovis gjenerazions e che chestis la pensin in maniere difarente des personis che a àn guviernât fint cumò. Ae fin dai conts al baste volêlu.
La grande fuarce autonomiste furlane dai agns setante e otante si è distudade e indurmidide, cualchidun al dîs che e je parfin muarte. In chestis ultimis elezions jo invezit o ai viodude une piçule lûs, fâle cressi e je dome une cuistion di volontât. Cheste e je la sielte di fâ tai prossims agns: crodi e tocjâ la Resurezion o se no començâ a imparâ a memorie lis litaniis dal De profundis. ❚
Luca Zoratti