FRIÛL EUROPE. Dulà sono il Friûl e la Europe? Si vote pal PE, ma no son dome novitâts

Dai 22 ai 25 di Mai si vote pal rinovament dal Parlament european (PE). I citadins di ducj i vincjevot stâts che a fasin part de Union europeane (UE) a son clamâts a sielzi i lôr rapresentants a Strasburc e a Bruxelles.
Chest viaç il vôt european al è calcolât tant che un referendum in cont de Europe, de UE e salacor ancje dal euro. Dongje des diferencis dai orientaments politics si palese une sorte di bipolarisim manicheist: di une bande, chei che a son a pro de Europe; di chê altre, chei ch a son cuintri.
In realtât a son ancje diviersis visions di Europe e di integrazion europeane. No son some chês dai nazionaliscj e antieuropeiscj, nostalgjics de sovranitât assolude dai stâts e magari ancje de nazion «una d’arme, di lingua, d’altare» e chês dai “partîts a nivel european” plui impuartants (Popolârs, Socialiscj e Liberâi), simpri sul ôr tra ideâi europeiscj e une ande minimaliste, economicistiche e intergovernative, ma ancje chês di fuarcis (la Çampe europeane, i Verts e i nazionalitaris e regjonaliscj de ALE) che a domandin une Europe divierse e plui europeane.
Chestis elezions a son marcadis ancje di une novitât impuartante. Pe prime volte i partîts a nivel european a indichin un candidât pe presidence de Comission. Cussì il vôt dai citadins al varès di contâ di plui pe definizion dal esecutîf de UE parcè che il Consei european (i cjâfs di stât e di guvier dai Vincjevot) al scugnarà tignî cont dai risultâs eletorâi tal proponi il president de Comission e soredut par vie che chest al varà di jessi elet de bande dal PE.
Magari cussì la otave elezion direte dal PE e fâs indenant ancje diviers problemis, che a son leâts sei a chei de Europe che a chei de politiche a ducj i nivei. Chês europeanis, in particolâr tal Stât talian, a restin ancjemò “elezions di serie B”, che a valin plui par verificâ la tignude di guvier e oposizion a nivel statâl, e chest aspiet al salte fûr tal dibatiment politic e te composizion de plui part des listis. Chel dai coleçs eletorâi, che chi di nô a son soreregjonâi, al è un altri pont critic. Par chest pal Friûl al è simpri dificil rivâ a vê almancul un so rapresentant tal PE.
Ma al ven il dubi che lis cuistions furlanis, che a son europeanis, no cjatin puest nancje tal cjâf di tancj candidâts.  ❚
✒ Marco Stolfo