MUSICHE. Fabian Riz e Orko Trio

Il titul dal disc? Biele domande. Nissun non. Dome Orko Trio e Fabian Riz. Se “dome” si pues dî in chest câs. Rock, jazz, punk, blues. Improvisazion e suns des vissaris. Al è un frulât indefinît e indefinibil, molest, oniric, fat di visions psichedelichis e esplorazions sperimentâls, il gnûf cd vignût fûr pe etichete Musiche Furlane Fuarte e nassût dal incuintri di chestis dôs entitâts: Fabian Riz, inconfondibile vôs e armoniche, e Orko Trio, ven a stâi Giorgio Pacorig, Fender Rhodes e Korg MS20, Michele Cuzziol ae batarie e Enrico Giletti al bas eletric. Un incuintri “grês” cetant il risultât vignût fûr: cinc tocs (Piano in plene, 32 cocktails & 1 vuarzine, El cunin suburban, Psicologjc muart blues e Ultimis peraulis di Hassan Sabbah, poesie di William S. Burroughs voltade par furlan) regjistradis “live” in pocjis oris e cence post produzion al DobiaLab di Dobie, in provincie di Gurize. «Si sin incuintrâts ae fieste Viva Onde Furlane di Mortean» nus conte Giorgio Pacorig «e al è stât amôr a prime viste. Si sin po cjatâts une volte, nô o vin fât la nestre musiche e Fabian al è intervignût parsore cu la vôs cence grancj adataments. Al è stât un cjatâsi basât suntun feeling vicendevul, sul “viodìn ce che al ven fûr”. E ce cheal è vignût fûr par nô al à funzionât e o vin volût, ancje gracie a le idee di Onde Furlane, documentâlu in chest disc che al à mantignût chest ande spontanie». I tescj a son di Fabian Riz, bluesman di Cormons, e a son ducj in marilenghe. I Orko Trio invezit a son bisiacs. «Jenfri nô e je une grande comunance di ideis. E il furlan si è integrât ad implen. Di solit la lenghe furlane si dopre in contescj “folk”, indulà che no je simpri une grande ricercje musicâl» al dîs Pacorig «mi plâs invezit pensâ di doprâ test e lenghe in maniere paritarie. L’ûs de vôs associade al test e a une funzion compagne a chei altris imprescj musicâi. Fabian al è stât come vê un element in plui che si è dal dut integrât inte formazion». Pocjis peraulis, i cuatri si cjatin, a bevin un tai prime di tacâ e po dopo a sunin. Cussì, cence tantis provis. Un mut di fâ che ur a plasût tant che si son fats vignî gust di puartâ chest esperiment tal forest. «O sin daûr a organizâ un tour in Polonie, Austrie e Slovenie cui Orko Trio e Fabian Riz. No son datis inmò, ma lu fasarìn dal sigûr dentri dal an» al conte Giorgio Pacorig «o vin dome di cjatâ il contest just. La nestre e je musiche di ricercje, musiche trasversâl che no à une precise colocazion tai festival. Al è un progjet un tic estrem, disìn». E su chest, no vevin dubis.  ❚
Natascia Gargano