Si va fûr de crisi ricostruint la nestre identitât

La crisi e continue a distruzi e a cambiâ in maniere profonde la realtât cognossude, cence che si intraviodin i segns di une juste reazion. Di là di ducj i tentatîfs di prospetâ une riprese che no je, la situazion e pâr blocade sul fonts, stant che lis resons che le àn sglonfade e fate sclopâ a son ancjemò dutis ativis, par nuie tornadis a meti in discussion. Ae fin dal 2008, in conference stampe CGIL CISL UIL, o ai scrit che la recession e sarès rivade in Friûl tant che un pugn pesant tal stomi, si sarès fermade par tant timp, e e varès ferît in maniere serie dute la nestre comunitât. Nus àn bolât tant che “teroriscj mediatics”, come int che e veve pocjis ideis e che e faseve dome rumôr devant di dificoltâts momentaniis. O vevin reson nô. E no parcè che o fossin induvins fortunâts, ma parcè che di diviers timp o tignivin sot osservazion atente il “Model Friûl”, il sisteme origjinâl che cun chel e jere nassude e cressude la nestre economie produtive, regjistrant e denunziant lis robis che no levin ben, chês dispès tasudis, soredut de politiche. Su chestis robis (limits, erôrs, intarts, mancjadis sieltis) no si è viert mai un dibatiment vêr e coragjôs. Anzit. La abitudin aromai consolidade di lei, cheste crisi plui di altris, dispès tant che efiet di fatôrs planetaris, “globâi” (come dî, alc che no si pues disgredeâ), al à contribuît fin cumò a evitâ angolazions di leture coretis. O crôt di fat che, in fin, al sedi dal dut necessari partî di nô, des nestris cuardis, de nestre dimension locâl, de nestre esperience concrete, dai nestris sucès e des nestris disfatis, pluitost che di analisis inafidabilis e astratis che nus costrenzin infin, avilîts e esasperâts, dome a alçâ bandiere blancje, a spietâ che l’aiar al cambi di bessôl. No vuei dî che o vin di assegnâsi in maniere integrâl la responsabilitât dal disastri, parcè che fâlu al sarès stupit e injust, ma nancje che no podìn continuâ in maniere bonate a fâ fente di jessi estranis aes stradis che a àn segnât in maniere progressive chest disastri e che lu àn fat deventâ desolant. Cuant che lis ploiis acidis, fiis di une finance sburtade e dal dut fûr control, a àn scomençât a colâ cun violence, si sin cjatâts cence ombrene e cence impermeabil. Capî o visâsi  dulà e cuant che ju vin pierdûts, al podarès judânus a cjatâju fûr, e duncje a tornânus une protezion che o vin bisugn estrem, ancje pal futûr.
Par un cuart di secul o soi stât sindicalist de ricostruzion post taramot. Cheste ca, par chel che o ai imparât, e rapresente la ponte plui alte di un nestri patrimoni solit e autentic (chel che nus à permetût, dreçant la schene, une magnifiche reazion corâl aes contrarietâts) e che o podìn clamâ “identitât furlane”, sens di apartignince a une comunitât vivude propit in chel sens, par tantis resons. Ma al rapresente ancje il principi dal declin dai ingredients di insiemi, origjinâi e iripetibii, che cheste identitât e à componût in maniere fadiose intal timp. De ricostruzion incà, par efiet dal rûl cressint e cetant impuartant de finance publiche e privade, dal sisteme des grandis impresis nazionâls e dai lôr metodis consolidâts di “relazion”, e ancje par efiet des sieltis politichis che a àn leât e vuidât chest insiemi complès, al partìs un percors di omologazion, di inlineament dal Friûl al rest di Italie, di staronzament de nestre specialitât. O soi convint che no larìn fûr de crisi, o o larìn fûr plui tart e piês di altris, se il fatôr di coesion de nestre comunitât, la nestre identitât, no ricjape il so rûl, inteligjent, ustinât, critic, costrutîf, finalmentri lontan dai colôrs des cartulinis, par contâ propit la veretât, par tornâsi a imboconâ lis maniis e fâ chel che o savìn. ❚
Ferdinando Ceschia
Segretari Gjenerâl UIL Provinciâl di Udin