Une violute ad ôr de strade

Cliput, dopo mês di ploie. E jê… li… cu lis sôs sûrs, coro di colôr e profum che a tornin an daûr an, di chês che ti plasin ancje a ti.
Al jere za di cualchi dì che o smicjavi di metimi a scrivi, ma dome chê violute ad ôr de strade e à viert la risultive dai ricuarts. Segnâl? Mi plâs crodi di sì, a conferme che “ricuart” no je la peraule juste par cui che si sint inmò dongje. “O soi strac” tu mi âs dit chê sere, al jere di joibe, cuant che ti ai puartade la ultime Patrie. Chei siet mês prime a son corûts vie di corse, sierantsi masse adore prin di rivâ a cognossisi miôr, ma dant distès avonde timp par saldâ une amicizie e une stime… par rivâ a fâmi cjapâ sù e meti vie tant. Rusticitas, intune peraule che e jere incjarnade te int dal Friûl: in trops vuê sano ce che e vûl dî? Magari cussì no, di chei che le cognossin, tancj a stentin a metile in pratiche parcè che nol è facil puartâle indevant, sintintsi il plui des voltis inadats par une ereditât che e pese.
Ma o stoi sbrissant suntun troi che mi à segnalât un di chei fruts che tu âs tirât sù: il moment de emozion, dal cûr, al à di lassâ il pas al timp dal cjâf, de idee, o miôr dai ideâi. Parcè che il to jessi furlanist, forsit al è plui just dî furlan, no si fermi al mît de persone, ma al deventi testemoni di passâ dal vecjo al zovin. Come esperience di vite concrete, arude.
Dome cussì nol sarà stât dibant il to scombati, il to scoreâ lis cussiencis in non di un popul tibiât, dispès tradît propit di chei che a varessin di difindilu. Un popul che, parafrasant chel Pieri Pauli di Cjasarsa che tu i âs dedicât une des plui bielis tra chês oparis che tu âs scrit, al spiete inmò chel “dì che il Friul al si inecuarzarà di vei na storia, un passat, na tradision!”
Probabil che il probleme al sedi propit chi: o stin a spietâ, cuant che invezit al è di cjapâsi sù e lâ incuintri al chel dì! Parcè che aromai e je ore passade e prin che al sedi masse tart o vin di fracâsi chel cjapiel, al diseve pre Checo, sul cjâf e no tignîlu in man.
Tu nus âs mostrât e tu continuis a mostrânussal cemût che si à di fâ, ancje se nol è facil stâti daûr in chês intuizions che a scjassin tant che tramontane.
Tu âs spietât la Fieste dal Friûl dai 3 di Avrîl par tornâ inmò une ultime volte a memoreâ chel moment storic deventât simbul pe nestre tiere.
Tu âs volût celebrâ la Pasche, il moment plui alt de tô vocazion, cuasi che tu sintissis di no podê partî cence fâlu inmò une volte, la ultime…
E tu âs vût adiriture Sant Marc, l’evangjelist di Aquilee, a compagnâti te cjase dal Pari, in chê dì che si sin saludâts. Ancje chescj, ju viôt segnâi di une vite profetiche e vuê o savìn ducj i doi che al è stât un “a riviodisi”.
Dopo 7 agns si consolìn, savint che “se il grignel di forment, colât in tiere, nol mûr, al reste dibessôl. Ma se al mûr, al bute une vore”.
Ma o sin oms, come che tu disis tu, e al è dibant platâsi: tu mancjis e inmò di plui tu mancjis a chest Friûl che tant tu âs tignût dûr par lui. O salvarìn lis nestris animis, ma tu continue a judânus ancje nô a tignî dûr.
Mandi pre Toni. ❚
Christian Romanini (@romanini77)