IL FERÂL. I furlans e il templi

O scomencìn chest gnûf an dal “Ferâl”, la rubriche dedicade a pre Antoni Beline, riproponint une sô riflession a pontadis. Il test complet al à il titul “I Furlans e il templi” e al presente un resonament sul rapuart dai Furlans cu la fede e la religjositât.
pre Roman Michelotti
***
Mi àn clamât a dî dôs peraulis sul rapuart fra i Furlans e il templi, par viodi se la religjon o la religjositât dai Furlans e je peade costituzionalmentri al templi o se il templi al è une categorie che ur è stade imponude e che duncje no sintin tai siei confronts chê dipendence dibot fisiologjiche che a àn di altris bandis. Al è un teme di grande atualitât e che mi tocje di dongje. In chescj ultins agns, cu la acerelazion esasperade e incontrolade che no sparagne nuie e nissun, si sin cjatâts ancje in cheste periferie dal imperi che si clame Friûl tal burlaç de laicizazion e de secolarizazion, che al met in discussion dut ce che al rivuarde il mont religjôs e sacrâl e duncje il templi. Chel templi che jo, come predi, o fâs part di profession o mission. Pa la cuâl la furtune dal templi e je ancje la mê furtune e la crisi dal templi e je ancje la mê crisi. Se al pes i gjavin la aghe, al crepe. E la aghe dal predi e je la vite dal templi, ancje se int sapiente e libare e dîs che prime e plui dal templi e varès di jessi la int. O almancul chel e chel.
Mi visi di vê rifletût a lunc sun cheste problematiche za cualchi an indaûr e lis mês riflessions lis ài strucadis suntun librut intitolât “La fin dal templi ise ancje la fin di Gjerusalem? E la fin di Gjerusalem ise ancje la fin dal mont?”. Lu vevi firmât, come date simboliche, ai 2 di Fevrâr dal 1993, fieste de Cjandelarie e de lûs, e ancje jo o cirivi un lusorut che mi sclarìs la scuretât personâl e ambientâl che mi invuluçave. Rivâ a capî se cheste svoltade, che e segnave la agunie o la fin di un mont che al veve regnât espotic par secui, e jere propit la fin di dut o dome la fin di une stagjon dal mont e duncje si podeve sperâ che si sarès vierte un’altre pagjine te storie dai oms. No je propit la stesse robe murî e parturî. Rivâ a capî, magari a traviers di chê fumate che e à simpri cerclât l’avignî, se la fin dal templi e je rude muart o se si pues pensâle come un part al jere l’intent des mês riflessions tormentadis. […] ❚
(al va indevant sul prossim numar)
pre Antoni Beline