Cuant che lis robis si fasin cul cjâf e vegnin fûr… bielis contis

Contis cence cjâf? Ce vuelial dî il titul dal concors che il blog leterari “Contecurte” al à inmaneât sul web e che si concludeve ai 31 di Zenâr? Al è un zûc di peraulis: no son contis cence cjâf ni code, ma cence il pont a cjâf. Ven a stâi che a àn di concludisi intune frase. Ma isal pussibil fâ une conte propit cussì curte?
Us al dimostrìn publicant i vincidôrs decidûts di une jurie che e veve dentri ancje il responsabil dal blog Raffaele Serafini, Franco Marchetta, Carli Pup di Onde Furlane. I risultâts a son stâts publicâts sul blog ai 23 di Zenâr, lait li di contecurtegnove.blogspot.it par viodi ancje chês altris contis.
1°) «Epopee in cuatri riis» di Renzo Brollo
E Diu, dopo vê passât la setime zornade a polsâ, vint plasmât il plasmabil, al restà a cjalâ lis primis formis di vite cressi, deventâ organisims, saltâ fûr dal mâr, madressi in dinosaurs, retii, uciei, mamifars, specializâsi in oms e daspò al passà la ore a viodiju cressi in stature e in sgrimie, fintremai che no rivarin a sdrumâsi un cun chel altri, lassantlu une altre volte di bessôl tant che, a chel pont, al cjapà la tiere e le scliçà, tornant a fracâle dentri te nape, di dulà che a jere vignude.
2°) «La Dumble sul Lât» di Xabi Xogrâr da Plêf
Za prime che si fos distudât chel Soreli che i Gjôs a àn vût impiât di fûc e di dolôrs, i aiars a vevin dispoiât de cinise lis ruvinis di Tenochtitlan, la Dumble-sul-Lât; ma lis mês lagrimis maris no si fermin cuant che o intivi sot dai dêts, tune sachete di piel, i rincjins verts de pueme dai miei dîs contents.
3°) «La plene» di Dree Venier
S’obrinchichelramaçsoifûrdiches-
tpantanbastartchemiscjafo…
Curiositât: di passe 40 contis rivadis, un cuart a son di autôrs di furlans tal forest. Une biele testemoneance ti trop che ancjemò i tegnin ae lenghe e di ce che al pues fâ il web se doprât ben. ❚
Redazion