EDITORIÂL – Par chei che no si rindin. La gnove resistence furlane

✽✽ Si siere un altri an e se si ves di cjalâ dome in cjase nestre un alc par jessi contents lu cjatìn. Cuant che li dal Visionari di Udin o vin presentât la gnove vieste grafiche pensade e inmaneade di Dree Venier, o jerin dongje a fâ une scomesse cun noaltris, cu la Region, che nus veve taiât i contribûts, ma soredut cun voaltris letôrs: tignî in pîts la Patrie tal mieç des dificoltâts cence gjavâi nuie dai siei valôrs e contignûts. Mi somee che se o sin chi a contâle, o vin vinçût almancul par chel che al rivuarde il fat che il nestri gjornal al è vignût fûr par dut il 2013, che a son cressûts i abonaments, che o vin passâts i 1000 “mi plâs” su facebook, che in tancj di lôr, e ancje cualchi istituzion, a àn decidût di stânus dongje cuntun intervent finanziari.
✽✽ Ma e sarès une falope fevelâ ben di noaltris e no viodi che invezit la situazion ator e je grivie, mai tant che vuê. Sedi par chel che al rivuarde la realtât economiche, sociâl dal Friul sedi pe idee stesse dal Friul.
Lu vin dit dispès: plui di cualchidun al sofle su la crisi par fâ passâ un model di region centralistiche, pontade su Triest, cirint di scancelâ la identitât furlane.
✽✽ O vin di jessi clârs su chest pont: no son dome triestins, romans o talianots in gjenerâl che a sburtin par chest gjenocidi linguistic, istituzionâl e storic: al è furlan il president de Cjamare di Cumierç di Udin, Da Pozzo, che al sburte pe unificazion regjonâl, disint che la politiche dal “di bessoi” e je finide; al è furlan il president dai artesans che al sburte par trasferî la Cna a Triest; a son furlans chei conseîrs regjonâi in prime file par sierâ lis provinciis; a son furlans chei dirigjents des “Latariis furlanis” che a vuelin vendi la aziende ae Granarolo. E vie indenant, la liste e sarès masse lungje. Furlans sotans, vendûts, che a pensin dome ai lôr interès o a chei dai partîts che ju àn metûts in chel puest. Di sigûr sì, ma cemût fermâju
Metintsi di traviers, fasint che lis lôr decisions, i lôr progjets a cjatedin oposizion. In sumis contant la veritat.
Une veretât che dentri di lôr i furlans a cognossin ben, ma che tantis voltis a tegnin platade, cuasit cun rassegnazion.
Rassegnâsi vuê al vûl dî pierdi dut. No dome chel che o sin stâts, ma soredut chel che o podìn jessi un doman e cence cheste sperance, chel doman nol esist.
✽✽ I nestris auguris duncje a son par chei mestris che insegnaran il furlan a scuele ancje cence risorsis, a chei lavoradôrs che no si fasaran pleâ de crisi, a chei imprenditôrs che no molarà jù i bregons denant des ufiertis dai forescj o aes bufulis des lôr organizazions. A chei di Pordenon e Gurize che cun dignitât e braure a declarin la lôr furlanetât.
Ae int de mont che no vûl viodi murî i siei paîs, a chê de plane che no vûl dome ciment e eletrodots.
A dutis lis feminis e oms furlans che no si rindin. ❚
Dree Valcic