IL FERÂL. A colin lis fueis

La Sierade, lis fueis che a colin, la stagjon che e finìs, l’Invier che si svicine… par pre Antoni dut al devente parabule, simbul di altre realtât: la vite dal om, la vite dal popul. Co e ven la brute stagjon, si pues pierdi ancje lis fueis, ma al è di salvâ l’arbul, parcè che l’arbul al riflorìs e la vite no si ferme. Tai moments dificii de storie ancje dal Friûl salacor si scuen rinunziâ a alc, a alc di no essenziâl, ma par un ben plui grant, par salvâ la vite dal popul. Si pues pierdi il folclôr, l’aspiet coreografic, il provisori, ma bisugne salvâ la sostance, la identitât, la anime, la lenghe, la culture profonde che e à tignût sù il popul tai secui e tes criuris dal passât.
pre Roman Michelotti
***
Mi somee îr che lis pontis dai ramaçs si jemplavin di vogluts e chei vogluts si vierzevin al clip dal soreli e il morâr centenari al sverdeave in dute la sô braure, come ch’al fos tornât zovin. E cumò al piert ogni dì di plui il so furniment e al mostre ducj i siei agns e lis feridis dal timp.
No si pues no provâ un frêt tal cûr, denant di chestis animis muribondis che l’aiar glaçât al strissine vie a so caprici, e no vê come la tentazion de fin. Ma la fin di une stagjon no je la fin di dut e la fin de fuee no je la fin dal arbul. Anzit, par podê sparagnâ energjiis e permetii al arbul di frontâ la gnove, tremende sfide, la fuee si sacrifiche par chel arbul che i à dade la vite sul vierzisi de stagjon. E il sacrifici de fuee al è il presit par che si perpetui il meracul de vite.
Se puedial cjapâ lis fueis e l’arbul come parabule di une realtât plui profonde e misteriose? Sigûr. Di fat, cjalant lis fueis, jo o pensi ai tancj muarts di chest an, fueis distacadis dal arbul dal gno paîs, e di altris paîs, e di cheste tiere biele e problematiche.
Prin o dopo dutis a varan di distacâsi, ma cui destinial che une e vedi di distacâsi cul prin frêt e chê dongje e sfidi la glace e la nêf? Cui destinial la ore e l’ordin che ogni fuee e à di bandonâ par simpri l’arbul che i à dade la vite e che jê e à judât a vivi?
Se nô si fermìn a la fuee, al è clâr che i conts no tornin. Bisugne slargjâ il voli al arbul e a la tiere che lu nudrìs e al mont che lui al furnìs. Bisugne cjalâ lis robis te lôr globalitât e complessitât, tun disen plui larc. Che al è un disen di armonie e di vite, ancje se la vite si sostente cui muarts. O crôt che nô o vedin il terôr de muart come fin inesorabil di dut parcè che o vin pierdude la vision armoniche de vite. O vin fate la falope, tragjiche, di meti al centri di dut la fuee, che invezit e je periferiche e acidentâl rispiet al arbul e al mont torator.
Il popul ebraic, te sô passion storiche, e ancje il nestri popul, te sô sapience ingrumade cul dolôr, al veve in prin plan l’arbul. E se ancje la fuee si sacrificave, lu faseve cu la fede che il so sacrifici al zovave pe vite dal arbul e duncje al jere un vuadagnâ impen di pierdi e un semenâ impen di strassâ. Ma se no vin plui la vision dal popul, de comunitât naturâl che e je prin di nô e dopo di nô e che nus dà reson di esisti e fuarce di cressi, cui nus salvaràial de disperazion?
A chest proposit, e je inluminant la afermazion dal vescul martar Oscar Romero: “O risussitarai tal gno popul”. Tant a dî: la fuee e pues murî; baste che nol mueri l’arbul. E il resonament nus puarte a une conclusion scontade. La fuee no pues vivi cence l’arbul. Di fat a pene che si distache e mûr. Al è ce che al sucêt a tante int che si inlût di vivi cence popul, paîs, culture, tradizion, lidrîs, ponts cardinâi. E vuê la tentazion no dome e je grande ma e je propagandade di int che si crôt moderne, libare, inteligjente, emancipade. Lis nestris però no son fantasiis o ilusions di fanatics o di esaltâts o di nostalgjics. E je leç di vite.
Biadis fueis di Visepente e dal Friûl e di ogni arbul dal bearç dal mont! Cemût no lagrimâ viodintlis a slontanâsi simpri di plui dal arbul crodintsi libaris, a vultulinâ cence ni difese ni rimpìn di grampâsi, a colâ miseramentri tai pantans, a jessi tibiadis cence dûl di pîts prepotents?
Intant che o ai butadis jù chestis notis, altris fueis si son distacadis dal arbul. Tropis personis àno fat vuê un altri pas lontan de risultive di vite?
Cirint lis Olmis di Diu, vol. 3 p. 24 ❚
pre Antoni Beline