EDITORIÂL – Si dopre ancje il taramot par lâ cuintri i furlans

✽✽ O soi stât a viodi “Pordenonelegge”, pe presentazion dal lavôr di Pierluigi Cappello.
Une prime considerazion che mi somee impuartante par fâ capî il clime de manifestazion, tant preseade a un grum di inteletualots: che si ves viodût un libri, un alc de editorie par furlan in dute la citât, nancje pal boro. Al è clâr che chi i organizadôrs no pensin par nuie al furlan, ma nancje la Regjon – che e tire fûr i bêçs – si sumie di meti adun alc in cheste direzion.
✽✽ Nol è però di chest che o fevelìn cumò, ma di un toc de presentazion a Cappello, de bande dal “cjâf” de manifestazion stesse Gian Mario Villalta, un altri inteletuâl che al dopre Pasolini cuant che i va ben, cuintri i furlans. Ma ce aial dite di tant trist, Villalta, di fâlu deventâ il protagonist dal nestri editoriâl? Di sigûr, no une robe masse inteligjente – ma parimentri pericolose – parcè che al è un segnâl di un pinsîr che al pues jessi adotât dai nestri sorestants.
Ve chi lis sôs peraulis, che al à dit par talian: “La ricostruzion dopo dal taramot dal ’76 e je stade la disfade dal Friûl, dulà che a son vignudis fûr lis piês cualitâts dai furlans, subite pronts a butâsi in bocje al consumisim e ai valôr borghês. Tant che ducj, in sumis, altri che diviers…”
✽✽ Prime, e cuasi scontade, rispueste: cui sêstu tu par permetiti di spudâ su lis fadiis di un popul, sul cûr e l’ardiment di chei agns tal tornâ a fâ sù cjasis e fabrichis, par tornâ a vivi. E chest al sarès pardabon avonde, ma ognidun al pues pensâ ce che al vûl, cence par altri contâ sflocjis: i numars de ricostruzion, e soredut i timps, a son culì, tai paîs, no su la cjarte. La diference cun altris realtâts talianis ancje.
✽✽ Il pericul, invezit, al ven di une altre bande di chest pinsîr. Se si met in discussion la plui alte dimostrazion concrete, storiche dai valôrs di un popul, ven a stâi la sô coesion sociâl tai moments di stente, la sô identitât coletive tal sfuarç di riprese, dutis chês altris a puedin colâ daurman.
✽✽ In sumis: se no si ricognòs il valôr speciâl de ricostruzion, la sô muse di difese identitarie, si pues sierâ cualsisei discors su lis diferencis.
O sin ducj compagns. Ce sens aial alore fevelâ di Friûl e Italie, di Friûl e Vignesie Julie, di podê pensâ a storiis diviersis, di progjets alternatîfs a chei decidûts a Rome o a Triest?
✽✽ Villalta nol è altri che il spieli di ce che a pensin tancj dai nestris sorestants e politics cuant che a fevelin de internalizazion, de agregazion e unificazion regjonâl. Il troi de centralizazion al ven prontât di operazions di cheste propagande ideologjiche: se duncje i furlans no son stâts diviers di chei altris nancje tal taramot, parcè àno di jessi diviers cumò?
✽✽ Ultime considerazion, tant par parâsi des critichis. E je une veretât che la ricostruzion e à dât une sburtade a un procès di cambiament de societât furlane, e à scurtât i timps dal passaç dal mont contadin a chel industriâl e dai servizis. Ma cheste e je la realtât di vuê, che e va frontade cu la stesse fuarce di chei agns. Une fuarce di popul. ❚
Dree Valcic