CJARGNE VIVE. Gnovis ativitâts tal Comun di Darte

Al somee che e tiri arie gnove intal Comun di Darte.
Ai 27 di Avrîl, al è stât screât il negozi di florist “Il fiocco”, di Sara Migotti e Marzia Candoni. “Cuant che o soi restade incinte – e conte Marzia Candoni – o ai tacât a pensâ di cjatâmi un lavôr part time e cussì o ai pensât di vierzi un negozi. Sara, che le cognòs da agns, e à simpri vude la passion pes rosis e alore o vin decidût di vierzi insieme chest negozi. A Tumieç, i presits dai afits a jerin alts. Achì a fitavin par pôc e alore o vin sistemât i locâi e o vin viert. La pôre di no rivâ insom e je stade tante ma cul jutori di int esperte e cun tante buine volontât, nuie al è impussibil. Dongje di rosis e plantis, si cjatin ideis regâl, bilietuts di auguris e si puedin ordenâ bombonieris, e o curìn ancje la preparazion des glesiis pes gnocis.”
Ai 10 di Mai, e à vierzût ancje la edicule e cartolarie “Non solo carta”. La idee e je nassude massime di Chiara Gortani che, cjacarant cui amîs, e à pensât di tornâ a meti in pîts tal paîs chest servizi che al mancjave di tant timp. A Otubar, Chiara Gortani e passarà la gjestion a di une altre zovine dal puest.
Dongje dai gjornâi, si cjate alc di dut par chel che al rivuarde articui di cartolarie e ancje cualchi ogjet particolâr fat a man  di une dite di Paulâr; in curt si podaran cjatâ i biliets des corieris, servizi di fotocopiis e di fax. Pal prossim an, si podaran ancje ordenâ i libris di scuele. In ogni mût, e je dute la disponibilitât par cirî di contentâ ogni esigjence dai clients.
Te frazion di Cedarcjis, ai 19 di Jugn e à tornât a vierzi, vistide di fieste, la “Antica Osteria Candoni dal 1915 – RistoWine Bar”. “Il locâl al è stât ereditât de mê femine – al conte Giacomino Rupil – e o vin pensât di ristruturâ l’ambient, cirint di curâlu cetant tai detais par che al sedi adat a ducj. O sin partîts par dâ la pussibilitât a la int di lavorâ. Cuant che o sarìn a regjim, o darìn lavôr a trê fameis. Tra un pôc, la gjestion e passarà a gno fi. In cusine a son agne e nevôt che a colaborin insieme, proponint plats fats in cjase doprant i prodots dal nestri teritori”. “Cheste cjase le à fate gno bis nono – e dîs Paola Candoni – che al jere impresari, e le à finide tal 1915. Il locâl al è stât dât in afit a divierse int. Dal ’60 al ’78 a àn tignude vierte la ativitât i miei gjenitôrs. Dopo, gno pari al veve vierte la buteghe dai colôrs, parcè che sul imprin dome il bar nol bastave, e a àn sielt di dâ in afit il locâl. La plui grande gratificazion e je cuant che la int e ven e e reste contente parcè che i plâs il locâl”.
Trê gnovis ativitâts in chescj timps di magre a son un biel segnâl, soredut pe zoventût che si met in zûc tal propri paîs, dant une biele e frescje bote di vite tal Comun di Darte.
Une mancjance metude in lûs di ducj e je chê des istituzions che a dovaressin jessi une vore plui presintis par dâ un jutori concret ae zoventût che e scombat par cjatâ un lavôr e par restâ a vivi in Cjargne.! ❚
✒ Marta Vezzi