SPECIÂL SAPADE. Bolzonello, a cesse cûl, al falope dôs voltis

Mi àn dite che Bolzonello, intune interviste a Radio Spazio 103, si è tirât indaûr. Nol sarès duncje cuintri di nissune domande, di nissun paîs che al varès gole di jentrâ in Regjon. Si visaiso de monede di Buie? Jo o resti su chel che o ai sintût e viodût: “Sappada resta in Veneto”, cheste e je le rispueste ae domande de gjornaliste Rai. Forsit cualchidun lu à visât che nol jere il câs di lâ indenant a pescjâ buiacis, ma dut câs, ancje cussì, la mê opinion no cambie: al assessôr i da fastidi dome sintî nomenâ alc di furlan. Nol sarà un câs che cuant che al jere sindic di Pordenon, la sô zonte e vedi decidût di no domandâ di tirâsi fûr de liste dai comuns furlanofons.
Ma o crôt che sul câs specific, chel di Sapade, al sedi lat fûr ancje dal so jessi istituzionâl. Bolzonello al pues jessi antifurlan tant che al à voie, al pues fâ di dut cuintri la nestre identitât e lenghe, sintîsi plui venit di un venezian e plui julian di un triestin. Al pues sintîsi plui dongje ae seconde componente di cheste Regjon cul tratut Friûl-Vignesie Julie. Afârs siei.
Ma dôs robis no pues perdonâi: la mancjance di rispiet pai sapadins e chê pe democrazie.
I fradis di Sapade a àn vinçût un referendum par tornâ in Friûl, che i plasi o no al siôr Bolzonello.
In chestis pagjinis o podês lei le storie di cheste bataie lungje e sufierte, deventade – se volês – un segnâl di sperance par dut il Friûl.
Lis istituzions, a fuarce di dâi, no son rivadis a frenâ cheste volontât di tornâ dongje a la Patrie, ancje se plui di cualchidun nol viodeve la ore che alc si metès di traviers. Cumò al è il moment dal ultin sfuarç e nissun al pues permetisi di lâ cuintri di ce che un popul al à decidût in plene libertât.
Une biele peraule che in tancj de bande politiche di Bolzonello a doprin dispès.
Simpri par chei altris.
Cuant che ur tocje ai furlans, a sunin dute une altre musiche, cence inacuarzisi des stonaduris ma lant indenant istès.
E je ore che su di lôr si sbassi il sipari.
✒ Dree Valcic