Friûl in vuaite par tignî salde la autonomie de nestre Universitât e ricurdâlu al gnûf retôr De Toni

La autonomie de Universitât dal Friûl, dopo jessi stade teme al centri de campagne eletorâl pe elezion dal gnûf retôr, e resterà un cantin dulà che, a partî dal Prin di Otubar a pontaran la lûs ducj chei sogjets che dal 2008 a firmarin un Pat cu la Universitât par riconfermâ la sô autonomie e l’inlidrisament sul teritori, cussì come che al è scrit ta so statût.
In chê zornade, cun di fat, la retore Cristiana Compagno, che e à vuidât l’ateneu dal 2008, e passarà lis consegnis al professôr Alberto Felice De Toni, sielt tant che retôr ae seconde votazion cun 345 preferencis su 920 votants. Cinc agns za fa al jere stât il sfidant de Compagno e i veve scugnût lassâ strade. Cheste volte, invezit, al à batût cence fadie il proretôr, Leonardo Secchi, e il diretôr dal Cirf, Paolo Pascolo.
Si che duncje, di chê zornade si scominçarà a capî tal concret cemût che De Toni al intidarà puartâ indevant lis declarazions che al à fat in cont de autonomie: “Sbaliât vê pore pe autonomie de Universitât” e “la autonomie de Universitât furlane no je negoziabile”. E dut chest, come che si sa, pûr pûr intune suaze dulà che la colaborazion tra ateneus e je une sfide e une scomesse che tocje frontâ par vê capacitât di atrazion, mantignî alts i nivei de didatiche e de ricercje e vê fuarce ancje economiche.
A meti in vuaite chei che si sono spindûts par fâ nassi e incressi l’ateneu, e je la cuestion de federazion jenfri lis Universitâts, sburtade dal Stât. La pôre e il supiet a son che, cu la scuse des sinergjiis, di fat Udin e pierdi capacitât decisionâl, di organizazion e  di progjetualitât. “Cumò che il Friûl al è di gnûf strent te smuarse di une crisi economiche cence pâr”, al à scrit il Comitât pe autonomie dal Friûl tai dîs de campagne eletorâl par il retôr, “si à dibisugne no dome di un sfuarç atîf par tornâ a cjatâ la capacitât di politichis di alt nivel in Friûl, ma ancje di domandâ ae nestre Universitât autonome di jessi, cun rignuvît impegn, il lûc dulà che a nassin ideis, progjets, ricercjis, culture par un gnûf svilup bon di recuperâ ocupazion, produtivitât, identitât, competitivitât e relazions a ducj i nivei”. La alternative, al à zontât il Comitât tal so document, “al è il pericul di une involuzion economiche dal Friûl, cun conseguencis siguris ancje pe stesse esistence dal ateneu”.
Insumis, l’imperatîf pal Comitât vuidât dal professôr Gianfranco D’Aronco ma ancje pes 32 istituzions che tal 2008 a àn firmât il Pat pe Universitât – cul intindiment di dî che jê no à di sintîsi dibessole a frontâ lis difficoltâts ma ancje che jê no pues fâ cence dal teritori che le à volude – al è che la colaborazion cun altris realtâts no à di compuartâ par nuie cession di autonomie.
“Su chest o starìn un grum atents” al conferme pal Comitât Roberto Dominici, “e o starìn a viodi se il gnûf retôr al rinfuarçarà chest Pat o se lu faserà durmî”.
Biel che si è in spiete di cheste sierade, cuant che il professôr De Toni al sarà tal plen dai siei podês tant che retôr, no si pues no ricuardâ che la sô elezion le à dedicade “ae tiere che mi à adotât, al Friûl”. Un sproc che al tornarà tal cjâf a chei che lu continuaran a stiçâ par che al tegni a strent la autonomie dal ateneu che al vuidarà fintremai te anade 2018-2019. ❚
Antonella Lanfrit