La gnove maiorance in Regjon e lis cuistions su la taule economiche

Cuant che Renzo Tondo, a scrutini ancjemò in cors, ma intant che za si profilave la disfate di misure une vore strente, al à refudât la ipotesi di tornâ a contâ lis schedis, cualchi espert al à osservât, no cence malicie, che forsit pierdi no i pesave propit cussì tant. In fin dai conts, in Consei regjonâl al tornave, ma cuntune cjame dal sigûr plui lizere. Eh sì, parcè che cumò, a vê di fâ funzionâ la Regjon, dopo la cure dimagrante dai tais resints dai trasferiments statâi, e varà di pensâ Debora Serracchiani. Che, tant par scomençâ, e à anunziât za che il so prin pas al sarà chel di tacâ un viaç cun direzion Rome par convinci il gnûf guvier a metisi une man sul cûr e slargjâ i cordons de borse. Une imprese che e sune tant che mission impussibile: se il guvier nol à ricognossût al Friûl nancje un sotsegretari – che e jere une “concession” a cost zero – figurìnsi se o podìn sperâ in segnâi plui… “concrets”. Dal rest, tra conzelament de Imu e altris amenitâts variis, ancje lis cassis dal Stât a somein destinadis a jessi simpri plui deficitariis. Mâl comun, nissune gjonde. Su lis risorsis che la gnove zonte regjonâl e destinarà al Friûl a pesin ancje i gnûfs ecuilibris teritoriâi: Gurize e Triest a son stadis determinantis pal sucès di Serracchiani, Pordenon al à viodût il trionf di un Bolzonello premiât cu la vice presidence e cuntun super assesorât (Ativitâts produtivis e agriculture). Lis jevis dal Belanç a son in man a Francesco Peroni (Triest), Lavôr e Energjie a Loredana Panariti e Sara Vito (dutis dôs di Gurize). La deleghe ae Mont e reste… inte plane, tes mans de Governadore che e ten par se ancje Infrastruturis e Relazions internazionâls. Ce vino di spietâsi, alore? Serracchiani e à confermât za che la tierce corsie de A4 e larà indenant, ma si prepare a limâ su lavôrs e coscj (a ancje su la Tav si preparisi a cjapâ sù lis propuestis di variant dal percors che a rivin dal teritori e che a compuartaressin ancje coscj minôrs). E à viert za aes domandis dal sindic di Triest, Cosolini, sui temis dal Puart: un ben ancje pal Friûl, ciert, ma dome se no si cjalarà dome a Triest ma a un sisteme integrât che al cjapi dentri ancje Monfalcon e Sant Zorç di Noiâr e che, magari, si integri no dome cul Centri intermodâl di Roncjis di Monfalcon, ma ancje cul Interpuart di Çarvignan, che la sô jevade dopo agns e agnorums e je ancjemò lontane. E simpri sul front des infrastruturis, stant aes promessis eletorâls, al varès di viodi la lûs un colegament svelt tra Udin e Pordenon (tant che consecuence de volontât di risolvi i problemis di acessibilitât de capitâl dal Friûl ocidentâl), che al dopri il plui pussibil la rêt viarie e feroviarie esistente, intant che e vignarès metude in bande la ipotesi di un passant autostradâl Cimpel-Secuals-Glemone, stimât di impat masse grues.
Al sta za cambiant l’aiar, invezit, in teme di energjie, sedi par ce che al tocje i rigassificadôrs (in particolâr par chel off-shore di Triest, ma ancje chel on-shore di Zaule nol à vite facile), sedi pai eletrodots, val a dî chei – cun percors (e modalitâts) contestâts – di Würmlach a Somplât e di Redipulie a Udin Ovest. Te stesse maniere, al è di spietâsi che ancje il par cumò “conzelât” progjet di slargjament de centrâl di Somplât al sarà ogjet di un monitorament atent. Dut di viodi, insume, cemût che si frontarà il probleme dai coscj de energjie, tant sintût massime in provincie di Udin, viodude la presince di impuartantis industriis cun grant cunsum di energjie. Che, in cualchi câs, a àn za butât li – tant che… “persuasion morâl” – il vencul de delocalizazion… E al è ciert che a son soredut lis misuris a pro de imprese e dal manifaturîr il “varc” li che il Friûl – la provincie di Udin e conte la metât des aziendis di dute la regjon – al spiete la gnove Zonte: disburocratizazion, smagriment des proceduris, razionalizazion dai braçs operatîfs metûts in racuardi tra di lôr (Mediocredito, Friulia, Finest… Ma ancje Turisimo Fvg, par une promozion incisive dal teritori), misuris a poie de cressite dimensionâl, il rivâ a gnûfs marcjâts, de ricercje e de inovazion. Interessant, a chest fin, al sarà ancje viodi cemût che e finirà la partide dute interne a Confindustrie FVJ pal rinovament de presidence regjonâl. A Alessandro Calligaris, manzanin, al sucedarà un esponent dal as Gurize-Triest; il non plui indicât al è chel di Giuseppe Bono, delegât aministradôr di Fincantieri (un “falcut”, che un pâr di agns indaûr al veve menaçât di lâ daûr dal esempli di Sergio Marchionne, cuant che cu la Fiat al à abandonât Confindustrie, ritignintle masse “morbide” intes relazions industriâls), ma si fâs strade ancje il non di Riccardo Illy, ex president de Regjon, che cu la zonte atuâl al podarès vê une divierse capacitât di dialic e di rapuart. Chel stes Illy che, par altri, al veve batût su la impuartance de economie de cognossince e promovût InnovAction, la rassegne de inovazion, che e podarès jessi riproponude di gnûf di Udine Fiere. Gnûfs ecuilibris politics teritoriâi permetint…
✒ Linux