SLOVENIE. Austeritât cause dal malcontent sociâl

E va indevant la rubriche di Franco Juri, screade sul numar di Març dal nestri gjornâl. Il nestri gnûf colaboradôr al è nassût a Cjaudistrie (Koper) in Slovenie/Jugoslavie intal 1956 di pari furlan e mari cravuate. Gjornalist e vignetist satiric, diplomatic, ex parlamentâr sloven, al colabore cun testadis slovenis e talianis. Intai Agns ’80 e ’90 si è interessât di dirits umans e al è stât deputât intal prin Parlament di Lubiane elet in maniere democratiche. Dopo la indipendence de Slovenie, intai guviers di Janez Drnovšek, al à vût incarghis impuartantis inte diplomazie dal so Paîs: ambassadôr in Spagne e a Cuba, e segretari di Stât ai Afârs forescj. (par savê di plui su Franco Juri, lait a lei La Patrie dal Friûl, n. 7 dal Lui dal 2011) www.lapatriedalfriul.org/?p=7146
***
Ma la gote che e à fat stranfâ il cit e che e svicine la Slovenie ai senaris grêcs, e je la politiche di austeritât radicâl imponude di un an in ca dal guvier di Janez Janša. Cuasi che al volès meti in pratiche la ‘dotrine dal shock’, descrite intal libri omonim di Naomi Klein, Janša – un ex comunist deventât ae fin dai agns otante un ‘eroi’ de indipendence e un mastin nazionalist conservadôr, vuê emuladôr declarât dal coleghe autoritari e amì ongjarês Victor Orban – al à scomençât il so secont mandât di prin ministri (il prin si jere consumât tra il 2004 e il 2008 cu la sô disfate eletorâl) cence mieçs tiermins, presentant ae nazion un senari apocalitic. La sô determinazion e à vût fin dal principi un neu indelebil; a son stâts propit Janša e il so aparât parapolitic a blocâ, dai bancs de oposizion al guvier Pahor e dai pulpits de ‘societât civîl’, ogni riforme struturâl ancje dome temerose, tant che par esempli chê pensionistiche e fintremai la lote al lavôr neri. Il fin al jere chel de destabilizazion dal guvier e lis elezions anticipadis che nol à vinçût ma che  – in graciis di un gnûf protagonist politic, la liste civiche di Gregor Virant, di ispirazion neoliberiste fuarte – al à rivât, di secont partît, a cjavalgjâ in maniere abile fin a fâsi elei prin ministri di une coalizion di centridiestre cul aval decîs dai vertiçs de glesie catoliche. La gusiele de belance, in plui dal ambigui Virant che si jere presentât aes elezions anticipadis dal 2011 tant che la alternative liberâl e ‘monde’ a pet di Janša, al è stât di gnûf il partît camaleont dai pensionâts (Desus), presint in ogni coalizion. Janša al à proponût al paîs riformis une vore duris, acompagnadis di restrizions preocupantis dai spazis democratics, di un infuartiment dal aparât repressîf, colpint soredut il setôr public e lis infrastruturis sociâls. Il so ‘Chicago boy’, il ministri dal tesaur Janez Šušteršicˇ (cuote Liste civiche di Virant), al jere determinât a puartâ in puart un plan di liberalizazion e di privatizazion dal setôr public che al ricuarde di dongje il model economic aplicât te Americhe latine dai agns 80 e 90. Une ritirade svelte dal stât de economie che e passe par une centralizazion transitorie dal patrimoni public – fin cumò framentât inte gjestion di trê agjenziis parastatâls -, o ben par une holding in stât di concentrâ ducj i bens statâi intes mans dal guvier e di sveltî lis pratichis di privatizazion. La idee liberiste di Šušteršicˇ e conte su la poie determinante des istituzions finanziariis europeanis e internazionâls, ancje se chestis no àn sparagnât al guvier Janša plui di cualchi critiche pai metodis argagnâts di imponi lis riformis. No scjampin aromai a nissun la conflitualitât sociâl e un incrudiment politic mai vivûts prime di cumò in Slovenie. Ancje par chest, Janša al somee aromai un politic brusât, un leader che nol scomet plui su di lui nancje il State Department.
(Al va indevant sul prossim numar).
✒ Franco Juri