MUSICHE. I Cjastrons a tornin in “Onde”: gnove edizion de trasmission rivelazion de Radio Libare dai Furlans

David Benvenuto, Cristian Pressacco e Marco Floran, vincint il concors par gnûfs talents Joy! Ce biele zoventût, realizât l’an passât di Onde Furlane cul supuart dal ARLeF, dai 12 di Avrîl a son di gnûf in onde ogni vinars a lis cuatri dopomisdì e la domenie a lis undis di matine, cu la seconde schirie des trasmissions. Pauli Cantarut, president de Radio, nus conte di chest progjet e ancje dal Premi Friûl 2013, che al sarâ inmò plui interatîf cul public.
Pauli, di ‘zûc’ a ocasion concrete di lavôr: nuie mâl di chescj timps…
Esat! Dopo un percors di formazion in radio cui nestris colaboradôrs e a contat cu la redazion, i Cjastrons si son metûts te sachete un contrat di lavôr par produsi une schirie di 20 trasmissions radiofonichis. Al è un esempli di cemût che si pues creâ oportunitâts di lavôr cu la lenghe furlane tal cjamp de comunicazion e dal intrategniment creatîf. I Cjastrons, cognossûts come Enrico Vueli Di Clap, Cristian Popoto e Mago Mesh, dopo vê imperversât tal etar furlan cuntune esplosion di scolte e di contats in Rêt, sui palcs di Suns e dal Premi Friûl e ancje sui gjornâi, viodût che a àn ancje tacade une rubricute cuotidiane intutulade “Sorestants e Sotans” su la prime pagjine dal Messaggero, a son tornâts cuntun dopli atac a lis orelis e lis masselis del public ma ancje par vie di une campagne teroristiche di secuestris devastants pe furlanetât che si cjate documentade cun videos su la Rêt (atenzion a no pissâsi intor a fuarce di ridi!).
Ise dibisugne di vôs zovinis in radio?
Sigûr, ce prospetive varessino pe nestre lenghe se no din vôs a la part zovine de societât furlane par che e conti te sô maniere e doprant la sô lenghe furlane il Friûl e il mont che si cjate a vivi? A son ancje proietâts tal futûr viodût che al è un gnûf personaç che, tal 2037, al è in vore a cirî di salvâ l’homo furlanus dal pericul di estinzion. Par cheste mission i Cjastrons a doprin ogni imprest necessari, comprindûts Twitter, Facebook e Youtube. La ricercje des personis adatis a puartâ indenant cheste imprese e ven fate cun zûcs e induvinins, dulà che il public al è il protagonist.
Al è online il bant par partecipâ al Premi Friûl: ce novitâts sono pe edizion di chest an?
Grandis novitâts parcè che, simpri cul supuart de ARLeF, o sin in vore a relançâ il Premi Friûl cuntune edizion che e proviôt la selezion dai musiciscj in Rêt, ancje cul vôt dal public. La realizazion di une tournèe ator par Friûl, cun concierts tes provinciis di Gurize e Pordenon, te Basse e in Cjargne. E dopo la finâl a Udin cun ospits speciâi. Ancje in chest progjet nus interessave meti in comunicazion lis gjenerazions e cussì al sarà fat ancje un seminari cui protagoniscj plui significatîfs de “gnove musiche furlane” che a trasmetaran ai zovins concorints la lôr esperience e cognossince musicâl dai repertoris, des modalitâts strumentâls e di composizion doprant la lenghe furlane. Parcè che al è impuartant cognossi la storie, dopo si pues ancje ribaltâle o remixâle ma no si pues scancelâle.
Se o vês gust di partecipâ fasêtlu dentri dai 15 di Jugn dal 2013. Il bant e dutis lis informazions a son su www.ondefurlane.eu/premifriul
✒ Natascia Gargano