AUSTRIE. Schladming, “Cope dal Mont di schi miôr che mai” i Stâts Unîts e la aziende di schi “Head” i plui sodisfats dal esit de copen

Pai spetatôrs e pe federazion di schi austriache, cul president Peter Schroecksnadel, chê cope e je stade la plui biele che mai. Content, cu lis peraulis “otime vore, no spietavin altri”, ancje il prin om de FIS Gianfranco Kasper. Se o dismenteìn i piçui problems tal Super G, di fat dut al è lât tal mût precîs che lu cognossìn dai austriacs o todescs. La audience complessive de Cope dal Mont e je stade un sucès clâr, cun plui di 300.000 spetatôrs: un numar cussì grant nol sarès pussibil in nissun altri paîs.
In veretât, i austriacs a jerin soredut malcontents dal belanç sportîf; al principi masse pocjis medaiis, i austriacs a vuelin jessi la nazion di schi numar un e chel a son deventâts cumò i Stâts Unîts cun 3 medaiis di aur rivadis dome di Ted Ligety, la star de cope. In Austrie, il sport dal schi e je la braùre di dute la nazion, alc che o podìn paragonâ dome al balon in Italie o Gjermanie.
✽✽ Lis marcjis austriachis “Head”
e “Atomic” a produsin i miôr schîs
Un dai grancj vincidôrs al è stât il produtôr di schîs »Head«. Tant che doi agns fa a Garmisch-Partenkirchen, la aziende di articui sportîfs cun sede a Vorarlberg (Austrie) e je, cun cinc medaiis di aur, il produtôr di maiôr sucès. Subit dopo, al secont puest, la “Atomic Austria”  ancje chê une societât austriache pe produzion di articui di schi, ancje se e fas part dal grup finlandês Amer Sports.
✽✽ Dodis dîs di spetacul. E dopo?
100 milions di euros, al costave il spetacul. Cui che al doprarà te citât di 4.500 abitants lis gnovis infrastruturis metudis sù dome pe Cope dal Mont, no lu sa nissun. Fin a 290 milions di euros a son stâts invistîts diretementri te citât di Schladming, ma trops in realtât si viodarà dome dopo agns.
✽✽ Edificis monumentâi fats sù
dome pal event
Cemût doprâ il centri congrès fat pai 2.000 visitadôrs tant che centri pai media intant de Cope dal Mont, al è un altri argoment dai critics. La megalomanie assolude si môf tor il gnûf implant di schi clamât “Planet Planai”, dulà che al è stât integrât un stadi di 30.000 puescj. Chi si cjate ancje un gnûf garage a cuatri plans, plaçât intune aree di zone alpine, che al furnìs cirche 4.000 puescj.
✽✽ Olimpiadis a Viene? Il Sindic
Häupl sigûr de vitorie
Michael Häupl (SPÖ) il sindic di Viene che al è ancje un dai politics plui potents in Austrie al è sigûr de vitorie. Viene e dovarès ospitâ lis olimpiadis estivis dal 2028: “Se o fasarìn domande, noaltris o vinçarìn”, al à dit tal mês di Fevrâr il sindic otimist. Ma, prin di rivâ a chest, i citadins a son clamâts aes urnis dal referendum di Març par dâ il lôr acuardi: dome pe aplicazion si varès bisugne di cirche 100 milions di euros. »Ancje se o vin une reputazion ecelente tant che capitâl culturâl e musicâl dal mont, o vin di cjalâ viers il futûr e fâ alc di gnûf”, al è il messaç centrâl dal sindic.
***
La cressite de popolazion
tal 2012
La cressite de popolazion in Austrie l’an passât e je stade significativementri superiôr a chê dal 2011: al prin di Zenâr dal 2013, daûr i risultâts preliminârs di Statistik Austria, a vivevin in Austrie 8,49 milions di personis. Tant che tai ultins agns no vin plui nassitis ma une imigrazion costante. Chê stesse situazion e je in Gjermanie, soredut in graciis dal gnûf marcjât libar di lavôr european che al sburte a une fuarte migrazion dal Est viers l’Ovest.
✽✽ Viene e cres in gracie de sô
posizion gjeografiche
Viene e regjistre di diviers agns la maiôr cressite de popolazion di dutis lis provinciis, soredut midiant dal trend migratori internazionâl ma ancje, dal 2004, cuntun salt positîf di nassitis. Viene e je deventade un cjamp magnetic in gracie de sô situazion positive sul marcjât dal lavôr. A part cheste migrazion, o vin ancje un gran numar di migrants cuotidians. La rêt de S-Bahn vienese – cussì si clamin i servizis feroviaris metropolitans e suburbans – e tache lis citâts Znojmo e Bcˇeclav in Cechie, Sopron in Ongjarie e la capitâl slovache Bratislave. Soredut di Bratislave, o vin une migrazion cuotidiane che no je cjapade dentri di nissune statistiche migratorie. Di Bratislava al centri di Viene tu rivis cu la suburbane in 58 minûts.
✽✽ Dome la Carinzie in declin
La Carinzie e je la uniche provincie che e à regjistrât un câl. Tal 2012 la provincie plui meridionâl e à pierdût cirche 900 personis, che al rapresente un câl dal 0,2%.
✽✽ Il câl de popolazion al va indenant
dal 2009
Dal 2009 la Carinzie e je la uniche provincie che e piert in mût costant residents. Ancje il numar di nassitis al è il plui debil a nivel nazionâl. La imigrazion – il motîf principâl dal aument de popolazion – nol pues compensâ il divari in Carinzie, al dîs Peter Ibounig , diretôr des statistichis statâls. Ogni dì, in medie, vot personis soredut zovinis a lassin la patrie – massime par studiâ a Graz o Viene – e la plui part di lôr no torne dongje.
Lis prospetivis a restin negativis pai prossimis decenis: fin al 2050 la Carinzie e pierdarà il 2,0% de popolazion – plui abitants che la citât di Cividât – e lis conseguencis finanziariis a saran gravis.
✒ Janez Erat