CJARGNE VIVE. Operadôrs culturâi in Cjargne

Tal mês di Zenâr a Tamau e je stade presentade la XX edizion de ‘Il Lunari fat in Cjargne’: simpri  une buine ocasion par rindisi cont che in Cjargne a son tancj operadôrs culturâi che di agns a lavorin sul teritori. Presints in mostre ben 19 lunaris, cun 19 tematichis diviersis.
Interessants i lunaris che a valorizin la lôr variant linguistiche: Nas Kolindrin/Calendario Resiano, fat dal Circul Culturâl di Resie Rozajanski Dum (il teme al è chel des prucissions di une volte); Dar schain – cholendar va Tischlbong/Timau, fat dal Circul Culturâl ‘G.Unfer’ in tamavês (al va indevant un percors di ricercje di toponims, trois, stai e stalis dal teritori); lunari di Zhare/Sauris, fat dal Circul Culturâl ‘Fulgenzio Schneider’ (vecjis fotografiis e scrits a documentin Criscj e mainis).
Biei e colorâts i lunaris dai fruts des scuelis primariis: Prât in Cjargne (disegns e descrizion par cognossi miôr ‘Monts e crets di Cjanâl’); Çurçuvint e Trep (‘Il calendari dal bosc pal 2013’).
Dopo a son i lunaris dai diviers paîs de Cjargne: Lunari di Çurçuvint, dal Circul Culturâl La Dalbide (‘Tai cjamps une volte’, ricercje des plantis e des samencis che si dopravin une volte); Lunari di Cleulas, dal Circul Culturâl Ricreatîf (‘Stalis’); Lunari di Paluce, dal Circul Culturâl Enfretors di Testeons (dedicât a doi personaçs impuartants: i cuadris dal pitôr Josef Macôr e lis poesiis di Gjeme Nodâl); Lunari dai Amîs da Mont di Dimplan (‘Vivi tal nosti paîs’, moments di vite plui impuartants dal paîs); Lunari di Rualp – Val e Fagnigola (‘Musicando’: musichis, cjants e sunadôrs di îr e di vuê); Lunari di Paulâr (‘Presepi della Valle d’Incaroio’); Guart Lunari (la Plêf di Guart e lis sagris dai paîs di Guart peadis a sants, disegns di Etore Di Sora); Lunari di Dimponç, dal Circul Culturâl Il nosti paîs  (‘Il C.R.I.C. centri ricreatîf di Dimponç e Cjadugnee’).
No mancjin i lunaris fats fûr de Cjargne: Lunari di pre Antoni Beline di Visepente (curât di Cristian Liberale, Alida Pevere e Manuela Quaglia); Lunari di Ospedalet (‘Ospedaletto ricorda’, e va indevant une ricercje de storie de comunitât cristiane); Lunari di Magnan (curât di Carlo Michelizza, Fabrizio Piccoli e Giordano Dose che al ripuarte un biel numar di plantis cun descrizions e fotografiis); Lunari di Bordan dai ‘Amîs di Bordan – chei dal lunari’ (‘Agns setante’ intal paîs di Bordan); Lunari dal Barêt par Palassôl di ‘Chei dal lunari’ (ostariis di îr e di vuê); Corpo Nazionale Soccorso Alpino e Speleologico (fotografiis su pe ativitât).
In timps di magre di finanziaments publics i operadôrs culturâi no molin il lôr lavôr: int che e dediche timp e oris pes ricercjis tai archivis, che e va a sgarfâ intai vecjos documents, che e fâs il pussibil par recuperâ e salvâ il grant patrimoni de memorie orâl. Il lôr lavôr, dispès inte ombre, al è impuartant pe tutele de storie dai nestris paîs di mont.
✒ Marta Vezzi