SPECIÂL – A ognidun il so My… spazi!

A ognidun il so spazi. E se chest al à di jessi virtuâl, inalore a ognidun il so «MySpace». Il lûc internet, rivât in Italie 3 agns fa, al è stât un dai social network plui cognossûts e preseâts. Tal moment dal bot, myspace.com al regjistrà 4.500 gnûfs profîi in dì. Soredut, al à vût il so moment di glorie fra i musiciscj e i artiscj, par vie che al è stât il prin a furnî une vetrine par fâsi cognossi e par pandi musiche. Un spazi te memorie dal web par cjariâ mp3, fotografiis, videos e curricula. Funzion che al à ancjemò vuê, e che si zonte a chê di base par dutis lis rêts sociâls: la pussibilitât di jentrâ in contat cun altris personis, apont par fâ rêt.
DUCJ CUL LÔR SPAZI_ E alore volêso che i furlans no vedin un lôr «space»? Scuasit ducj i cjantants de sene regjonâl a àn un lôr profîl. Dispès, a son peâts un cun chel altri. Chel di Cristina Mauro, za front woman dai Flk, al scrîf te presentazion: «O volarès jessi part di une umanitât dulà che lis lenghis a sedin puartis di acès viers la interioritât profonde dal jessi uman. O cjanti in marilenghe, par vie che o soi profondementri convinte dal valôr des culturis minoritariis». Po e incjante cu la sô vôs ancje i navigadôrs plui distrats cun «Sul ôr» o «Vegle di lune». A àn un lôr spazi, i Flk, cun biografie e progjets. A Mauro si rive ancje dal profîl dal cjantautôr cjargnel Lino Straulino, che i è peât ancje il musicist Matteo Cimenti, di Vile, che al dîs: «O vîf ai «confins dal Imperi», la Cjargne segrete e scuindude, e o suni la ghitare di autodidate». E Andrea Del Favero, musicist e produtôr di Sant Denêl, diretôr artistic di Folkest, al fevele dai siei progjets, e un al è chel  cul grup dai Blixxa.
ANCJE PAR INGLÊS_ Altris esemplis, fra i tancj. Loris Vescovo, sît scrit par inglês, al met in link ancje il lavôr davuelt cun Stefano Fedele e cul stes Lino Straulino (www.myspace.com/straulinfedelvescul). Dal profîl di «Radio Onde Furlane» e de «Musiche furlane fuarte» si à colegament cun «Brût e madone», cinc elements che si metin adun – si lei – «par dâ cuarp a une iniziative spetacolâr, che e à sconvolt il panorame musicâl interregjonâl. Tescj par furlan e heavyfolktrashmetal in distorsion». Si cjatin i «Dlh posse», Dj Tubet. E ancje i «Carnicats» – cjargnei, distribuîts de etichete indipendente Redd Army (link a I-tune) – che a messedin  hip-hop, soul, reggae e funk. Di Tumieç, il cjantautôr Aldo Rossi, che al inzorne lis sôs produzions, cu lis tracis dai siei cd. Gigi Maieron invezit al à un «fan space» cun dutis lis ativitâts.
LA SORPRESE_ L’outsider, però, al è Bruno Furlano. Nassût in France, si definìs composidôr, che nol scrîf ni al fevele in marilenghe, cun Feagne tal cûr. Al cîr compagns di musiche. Testualmentri: «Jo o ai voe di fâ une band cun gno paesans, ma jo vîf lontan: pensi ch’al sares plui facil di tacâ cun provis virtualis madats in mp3, par pode suna dal vif 4 o 5 concierts ogni an. Se ti plâs el gno lavor, fati cognossi». Sono ducj profîi vêrs? Come par Facebook, tancj a saran patocs (fake). Par esempli, Bruno Pizzul al à 379 amîs e un profîl che lu dîs in pension, daspò une vite in Rai. Al à il so «space», ma cui nus disial che al sedi propit so e no di cualchidun che lu vedi fat «my»?
Oscar Puntel