AUSTRIE – Fin de contese tra i partîts di guvier sul “servizi militâr obligatori sì o no”: il popul al dîs di no al trend european di abolî la coscrizion

Vie pe campagne eletorâl di Viene, tal mês di Otubar dal 2010, il sindic di Viene Michael Häupl (SPÖ) al à domandât di decidi cuntun referendum sul avignî dal servizi militâr obligatori. Dacuardi a pro di un esercit professionâl a jerin i Verts, BZÖ e il gnûf partît tor il miliardari canadês-austriac Stronach; cuintri, il partît popolâr e la diestre popolâr FPÖ.
Tal referendum che si è davuelt ai 20 di Zenâr dal 2013, il 59,8% dai eletôrs al è stât a pro dal mantigniment de coscrizion. Dome il 40,2% dai austriacs a vuelin un esercit di professioniscj. Sorprendente la alte afluence aes urnis,vâl a dî plui dal 50%: chest al mostre la impuartance dal teme pe popolazion.
Dome te capitâl Viene la maiorance e à votât pe abolizion dal vieri sisteme. La opinion de popolazion rurâl e je stade determinante: lôr a considerin il sisteme in vigôr une tradizion nazionâl di mantignî e une garanzie di assistence in câs di catastrofis. Ancje in Austrie o vin simpri di plui events estrems tant che conseguence dal cambi climatic globâl.
I argoments
Dispès si à mostrât che i servizis obligatoris a son mancul eficaçs, e plui che dut il paiament di 300 euros al mês nol sburte i zovins a fâ alc. Si visìn che cirche 5 agns indaûr, un procès simil al è capitât in Gjermanie. E inalore l’argoment decisîf al è stât il sparagn di coscj. La riviste “Der Spiegel”, tal Jugn dal 2010, e à descrivût la situazion dai coscrits tal esercit todesc come “decretât a combati par parâ vie la stufe”.
Aromai no vin plui di difindisi cuintri il nemì sovietic – argoment che in Austrie al veve il so  significât – come tal 1956, intant de invasion des trupis sovietichis in Ongjarie o tal 1968, in ocasion de “Primevere di Praghe”. Vuê o vin di frontâ crisis e terorisim cuntun esercit tecnologjizât e professionâl. De fin de vuere frede, paîs dopo paîs a àn trasformât l’esercit intun esercit volontari e professionâl. Cheste tindince e dure ancjemò vuê. Tal 2010, 24 dai 28 paîs de NATO a jerin za indotâts di un esercit di professioniscj. Tra lis potencis militârs de NATO, dome la Turchie e ten dûr cu la jeve militâr. Chescj culì parsore a jerin i argoments dal promotôr, vâl a dî il Partît Socialdemocratic (SPÖ).
Essenziâl pe conservazion de sovranitât e de neutralitât dal paîs
Al contrari, il cjamp conservatîf al viôt te coscrizion un “contribût indispensabil pa la Austrie”, essenziâl pe conservazion de sovranitât e neutralitât dal paîs, e cul servizi civîl ancje impuartanton pe protezion civîl e pal sostegn dal sisteme sociâl.
La campagne eletorâl e je stade plene di emozions: o podaressin fevelâ di un confront ideologjic tra i doi partîts di guvier, anzit la colme di plui di doi agns di controversie. Il vincidôr di cheste bataie – il partît popolâr – al varà lis miôr prospetivis pe elezions pal gnûf guvier che a saran za tal Setembar di chest an, o ancjemò prime.
***
Storie
L’esercit austriac “Bundesheer” al è vignût fûr des fuarcis armadis comuns austroongjaresis, vâl a dî dal austriac “kk Landwehr” e dal ongjarês “k.u. Honvéd”. La lenghe uficiâl e je stade chê todescje, però di fat in pratiche al jere un esercit multilengâl. In diviersis parts de monarchie si dopravin trê lenghis; dome i comants di base – cirche 100 peraulis – a jerin dapardut par todesc.
Il Bundesheer al funzionave dal 1920-1934 tant che esercit de Prime Republiche e fin al 1938 tant che esercit dal stât di Austrie. Dopo l”Anschluss”, al è stât integrât te Wehrmacht todescje, dulà che a àn rinfuarçît soredut lis trupis di mont.
Dopo la fin de ditature naziste, sul imprin la Austrie tant che paîs ocupât des fuarcis aleadis no disponeve di militârs. Ai 27 di Avrîl dal 1945, cun dut achel il guvier di Renner al impastanà l’Ufici di esercit ‘Heeresamt’ , sot la vuide dal sotsegretari Winterer. Il gnûf ufici si ocupave de dismobilitazion de Wehrmacht sul teritori de Austrie e al veve di preparâ dut ce che al coventave pe creazion di fuarcis armadis propriis.
Tratât di stât e difese proprie:  B-Gjendarmerie, 1952–1955
Il Tratât di stât che al tornave di gnûf a la Austrie la sovranitât, al fo concludût dome tal Mai  dal 1955, dopo che une delegazion dal guvier e veve prometût a Mosche la neutralitât dal paîs.
Tant che prime fuarce armade, e fo creade il prin di Avost dal 1952 la B-Gjendarmerie: responsabii de organizazion a jerin i ex uficiâi de Wehrmacht. Fin tal 1953, la B-Gjendarmerie e veve cirche 4.100 oms. Ae date di jentrade in vigôr dal Tratât di stât, e fo costituide la base dal gnûf “Bundesheer”. Subit dopo la sô fondazion, il gnûf esercit al à vût il compit di protezi la frontiere inte circostance de rivolte ongjarese tal 1956.
L’ultin ûs di grandis unitâts militârs cuntune mobilitazion parziâl, al fo tai dîs de vuere slovene, tal Istât dal 1990. Te colme de crisi, a jerin impleâts 7.700 soldâts, 150 cjars armâts e 60 avions, e 1.250 toneladis di munizions a jerin stadis traspuartadis fin sul confin.
✒ Janez Erat