CJARGNE VIVE. I fradis di Rualp e Val

Sintî cjacarâ di cantîrs, di progjets pal doman, di voie di lavorâ sul e pal teritori nol è tant facil, massime in chest moment di crisi gjenerâl. Laura, Rosanna e Loris Bombardier a son trê zovins fradis di Rualp e Val che a àn metût in pîts ben cuatri ativitâts. “O sin partîts principalmentri cun nestri pari te imprese edîl”, e conte Laura. “Jo o soi perît edîl e o ai viert un studi. In teorie, jo o vevi di fâ il perît, gno fradi e gno pari a vevin di puartâ indevant la imprese e Rosanna e varès vût di fâ l’agjent imobiliâr. Dopo, al è sucedût che gno pari al è vignût a mancjâ tal 2004, e o vin scugnût ribaltâ dut: o vin mantignût il studi di perît, jo e gno fradi o vin tignude in pîts la imprese, Rosanna e à mandât indevant l’ufici e cussì o vin cirût di stropâ dutis lis busis a nivel tecnic e aministratîf. O  sin lâts indevant ancje se cun tancj sacrificis e no pocjis preocupazions. Nol è stât sempliç rivâ a gjestî dut, soredut parcè che ducj i trê o vevin fîs piçui. Nestre mari nus à dade une grande man: jê e viodeve dai fruts e nô sui cantîrs. Prime che al murìs gno pari, o vevin inviât il progjet dal Bed and breakfast, e par gjestîlu o vin metût in pîts une societât di ricetivitât. Duncje, o vin il studi di perît, la societât di ricetivitât e la imprese edîl.
O vin costituît ancje une societât agricule: il prin pas al è stât la instalazion dal implant fotovoltaic a Rualp e Val. L’implant nus da la pussibilitât di vê une jentrade che nus puarte a svilupâ altris progjets. La intenzion e je chê di rivâ a doprâ ce che il teritori ti da, soredut lavorant dongje cjase e podint cussì stâ di plui cui nestris fîs. I nestris vecjos a son rivâts a vivi cu la vacje te stale fasint fadiis e no vint lis comoditâts di cumò: e je int che e je rivade a 90-100 agns parcè che si son fats ducj i anticuarps e a àn vivût ben, gjoldint di plui la vite”.
I fradis Bombardier a son une farie di ideis e forsit il segret al è propit achì, parcè che “Il nestri lavôr al è bielissim. Nô o vin une grande passion par chest lavôr”. Pal doman, ancjemò tant di fâ, e in confidence nus contin: “O vin un altri progjet che però al è inmò dome su pa cjarte: la realizazion a Rualp e Val di une sorte di implant a biomasse dulà che – brusant i sterps – si prodûs corint eletriche che e vignarà vendude. Cun di plui, si oten aghe cjalde pal riscjaldament des cjasis dal nestri paîs”. Cui lu varessial mai dit che si podès vivi ancje a Rualp e Val? ■
Marta Vezzi