AUTONOMIE. La politiche e à di integrâsi cul teritori

La autonomie e je tornade cun fuarce al centri dal dibatit politic di cuant che il president del Regjon Renzo Tondo al à anunciât un gnuf percors pe sô aleance di guvier, sgançantsi des fuarcis politichis talianis e provant a meti dongje une fuarce gnove. Ma ce aial a ce fâ chest gnûf grup autonomist cul autonomisim storic che Cavallo al à cognossût? «Pardabon pôc» al amet Cavallo, che al ven di une çampe nazionalitarie «che e viodeve tant che necessari integrâsi in maniere fuarte cul teritori. La mê tessare di “Democrazia Proletaria” e veve scrit parsore “del Friuli”, parcè che o jerin une federazion indipendente in dut e par dut».
Ma alore ce pensial de gnove vocazion autonomiste di Tondo?
Al somearà strani, ma o pensi une vore ben. O crôt che la zonte Tondo e sedi stade une des piês dai ultims 50 agns, che e à fat pocjis e brutis leçs e che e à tignût il piês di Illy sdrumant invezit il miôr: ma cheste sielte mi plâs. O soi cunvint che si trati di une sielte strumentâl e fate dome par convignince eletorâl, ma mi plâs distès.
E parcè?
Parce che e riscje di jessi un pont dulà che, almancul tal centridrete, no si tornarà indaûr. E par chest e podarès inviâ une evoluzion positive dal sisteme politic furlan viers di une autonomie di fat dai partîts di Rome. Se ancje la çampe, che su chest teren no à dit nuie di simil, e fasès une elaborazion sul teme, la politiche nostrane e vuadagnarès une vore.
Ma isal spazi par un revival autonomist furlan?
Cumò al esist un autonomisim “vandean”, di rapresentance, fat di siglis che a àn un consens margjinâl. Ma al è ancje un autonomisim platât, che o definirès sociâlrivoluzionari, che al è atîf in cjamps difarents di chel de politiche. La culture, l’ambient, lis associazions. E di int a’nd è tante che si ricognòs in cheste identitât. Tignît cont ancje de burocrazie che si è disvilupade intor dal furlan: ancje chestis professionalitâts a son plusoris, e a son ancje lôr in spiete di cualchidun che ur disi alc di furlan.
Tondo?
No sai se al varà la fuarce di lâ cuintri il so bloc triestin di riferiment. Ma une robe e je sigure. Lui al sta fevelant di autonomie, la çampe e tâs. Cun di plui, se al vinçarà al varà un guvier talian di color difarent e al larà a gnocis tal barufâ cun lui par afermâ la sô idee di autonomie. Se invezit al ves di pierdi, al tonarà cuintri di une çampe che no ten cont de identitât dal so popul. In ogni câs, nol varà plui di messedâsi cui partîts talians. E chest al è passaç che nol è di pôc cont.
La tutele de lenghe fasie part di chest procès?
Sigûr! Al è impuartant che lis fameis le ricognossin come un valôr e no si vergognin di jê. Ma cumò e je une cussience plui di cûr che di cjâf: si vûl ben al furlan, ma no si à capît il valor didatic e formatîf che e à cheste lenghe intun mont simpri plui multilengâl. La scuele e la Universitât a varessin di pontâ su chest valôr.
Ce avignî viodial pal Friûl?
O speri intant che il Friûl al voledi cjapâ in man il so avignî, cence retoriche o ideologjie.  ■
Walter Tomada