TAL ETERE. Cjastrons su Onde Furlane

Al è rivat il moment dai Cjastrons. Il tercet componût di David Benvenuto di Bicinins, di Cristian Pressacco di Flaiban e di Marco Floran di Colorêt di Montalban al à fat il so esordi uficiâl sui 90 Mhz di Radio Onde Furlane.
Dopo vê frecuentât i studis de “radio libare dai furlans” par partecipâ a “Joy! Ce biele zoventût” e dopo vê vinçût propit il cors-concors par gnovis vôs radiofonichis in furlan promovût di Onde Furlane e de ARLeF (Agjenzie Regjonâl pe Lenghe Furlane), i trê speakers iriverents a àn scomençade ai 26 di Otubar la lôr esplorazion, in Rêt e in modulazion di frecuence, de societât furlane contemporanie.
Ogni setemane, il vinars des cuatri aes cinc dopomisdì e la domenie in repliche des 11 a misdì, i Cjastrons, cu la lôr trasmission omonime, a frontin lis tematichis plui atuâls de societât furlane, tra argoments complès, lûcs comuns e temis plui matarans e lizêrs: de scuele ae tecnologjie, des sagris ae movida, fintremai a droghis, alcoolisim, abusivisim, prostituzion, razisim e politiche. Dut frontât cun lizerece, ritmi e sgrimie: in sintesi, “cun snait”. Intervistis par strade, coments dissacrants, riflessions tra il seri e il mataran par contâ il Friûl di vuê.
Te prime pontade, ur è tocjade ai students des scuelis superiôrs di Udin dî la lôr fûr di ogni censure, intant che a spietavin l’autobus che ju puarte a cjase. Une viertidure soft (ma nancje tant) che dopo i vignaran daûr temis simpri plui dibatûts, partint di chei afrontâts la setemane dopo, cuant che a citadins di ogni etât ur àn domandât di esprimisi su sigurece, diviêts, videocontrol e legalizazion de prostituzion.
Grant spazi ancje ae parodie. Cemût saressie stade la serie animade “Dragon Ball” se i siei protagoniscj no fossin stâts creâts in Gjapon ma in Friûl? La rispueste e je “Dragon Bale”, il prin manga radiofonic furtan, cun protagoniscj “Gocule” e “Vighi Veghiete”, doi supererois plui avodâts aes barufis di ostarie che aes arts marziâls. E la gnot “made in Friûl”? Esagjerade, cui dj che a sunin su plachis di gridele e i discotecârs che “a purcitin” tra un toc e chel altri o che a folin la ue intune sale somerzude dal most.
Ma no finìs achì. “Cjastrons” si propon di seguî in direte il tentatîf di rivoluzion che si sta preparant tal Friûl di Mieç. Un event che vuê al è daûr a cjapâ forme tai meandris dal web e che al puartarà i furlans no dome a vê la lôr “rivoluzion 2.0”, ma ancje a disbletâsi, in maniere clamorose, de etichete di “popul sotan”.
Anunziâts ancje torneus in direte radiofoniche, cun ospits speciâi che si son autoproclamâts rapresentants dal propri paîs di origjin e che si sfidaran intun piçul “Zûcs cence Frontieris” verbâl.
Dut chest par 20 setemanis. Cun Enrico Vueli Di Clap, Cristian Popoto e Mago Mesh, alias David Benvenuto, Cristian Pressacco e Marco Floran. “Cjastrons”: un non, une garanzie.
Su lis frecuencis di Onde Furlane e in rêt ae direzion www.ondefurlane.eu ■
Redazion