LADINIE. Striis, fadis, orcui

PAI LADINS DOLOMITANS_Tal mont ladin, tantis a son lis figuris che a insiorin il panorame des liendis e des storiis popolârs: cualchidune e je di ispirazion todescje, cualchidune di orgjin slave e altris a son unichis dome de realtât ladine.
Lis fadis leadis ae aghe a àn non “Gane” (in Val Badie), o “Vivane” in Val di Fasse , o “Anguane” in Cjadovri: il lôr cjant soâf al mande in arût ducj i oms che lis scoltin.
Salvadiis a son, invezit, i “salvani” che a vivin tai landris, a fevelin pôc e mâl, e a patissin fam e frêt. I “morkyes” a son i nanui che a san lavorâ i metai e che a àn capacitâts misteriosis. Un puest di rilêf lu àn po l’orcul, che al è un burlon, ven a stâi un diaul che al cjape la forme che plui i plâs e che al rît di dut e di ducj; il Bao, che al è un zigant vistût di neri che al cîr la canaie che e disubidìs ai gjenitôrs par parâle jù tal infier o, almancul, par spaventâle; il Pavarò, un orcul a vuardie dai cjamps, che al taie lis gjambis cul falcet ai fruts che a invadin il so teritori.
I drâcs no son tant presints, invezit frecuentis a son lis striis che a puartin disgracie ai paisans, e la “siore de mont”, une dame vistude di celest e spes cercenade di animis di fruts muarts di piçui.
Tra lis liendis ladinis, la plui famose e je chê dal Ream dai Fanes che e conte di un potent ream tes Dolomitis, aleât des marmotis, che al finì par colpe di un re che al tradì il popul par vie de aviditât di aur. Si trate di un cicli epic, tramandât in forme orâl par secui e trascrit di Felix Wolff tal 1932. In Ladinie si crôt ancjemò vuê che i sorevivents dai Fanes a stedin spietant sot i crets di saltâ fûr e di fâ rinassi la lôr grandiositât.
La liende e je tant preseade tes valadis dolomitichis, al pont che tal 2005 Susy Rottonara, Roland Verra e Hans-Peter Karbon a àn produsût un cine dal titul “Le Rëgn de Fanes”, vincitôr tal 2008 dal premi pal Best International Score al Garden State Film Festival.
IN FRIÛL_ La superstizion e la magjie si messedin tes contis furlanis. Tal Cjanâl dal Fier si cjatin lis Aganis, sioris da la aghe; su la Mont Cjanine a vivin lis fadis che tes gnots di lune plene a balin su la piche de mont. Te buse dal Prestreljenik al pâr, invezit, che al sedi di cjase il diaul che, cuntune ridade di sgrisul, al cjape pal boro i oms pai lôr fastidis.
Sul flum Timau al viveve un timp un drâc che al fo copât di Sant Ermacure; te Val de Bût al è a stâ il Danât dal Moscjart, ven a stâi un om che al veve vude la proprietât de mont sore Paluce cuntun imbroi e, par colpe di chest, al è stât condanât a restâ peât ae mont e a sdrumâle a colps di picon.
A Dogne si è fate strade la liende di un scûr induvin clamât Zuan Toni Neri che al à profetât la fin dal mont “cuant che lis feminis si viestaran come oms, i fruts si movaran cence tocjâ par tiere, i oms a saran cussì pôcs che a scugnaran imbraçâ i arbui, la Val Dogne e sarà cuvierte di ciment”.
Tes galariis di Rabil a son i nanui, e te Val Cjanâl la vecje vistude di peçots (Perchta), che te gnot de Pifanie e puarte vie i fruts o si fâs dâ macarons e ardiel.
In Cjargne, tes cuestis de mont Tencje, si cjate il “Plan des striis”, dulà che lis striis si incuintrin e a fasin danzis pe fertilitât.
No si puedin po dismenteâ i sbilfs, folets dai boscs, amants dal divertiment. Ma il torment plui famôs pai furlans al è Cjalcjut, o Vencul o More o Trute, un folet che si sente sul stomi di chei che a duarmin e ur impedìs di respirâ. Si lu ricognòs par vie che a buinore chei che si dismovin a cjatin une semence di vene o un piçul claput su la panze.
TAI GRISONS_ Fantasimis, drâcs, striis, princips triscj, folets, gjigants, feminis in forme di muscli, canibai, cavalîrs: ve il mont svuizar, ce siôr che al è di personaçs popolârs!
L’om salvadi al è une des figuris plui tipichis dal arc alpin dai Grisons. A metât tra om e bestie, la sô fame e je peade ancje aes condizions dal timp atmosferic: di fat, i proverbis a fasin riferiment al umôr dal om salvadi par spiegâ il timp, par vie che tai dîs di soreli lui al spiete la ploie e tes zornadis grisis al prepare il seren. Lis flabis a contin ancje che, se nol ven ridût o disturbât, l’om salvadi al disvele ai contadins i segrets de produzion dal formadi o al puarte a passonâ i lôr arments. La sô cjase e je tal bosc, un mont che lui al cognòs come il paternoster. ■
Ilarie Colùs