IL FRIÛL FÛR DAL FRIÛL. Par une emigrazion no folk

La Patrie dal Friûl e à scrit plui voltis de Clape Friûl dal Mont (www.clape.it) e des ativitâts dal so president Paolo Della Schiava, ma e je la prime volte che un gjornâl i domande il parcè di chest so impegn che al dure plui di cuarante agns tal mont de diaspore. Di Pontebe, dulà che al è nassût tal 1946, Paolo si è trasferît a Turin tal 1968 dulà che di sabide e di domenie al tacà a frecuentâ il Fogolâr. Il passaç di emigrant “dopolavorist” a chel plui impegnât e cussient al nas di une schirie di cundizions: lis amiciziis cui furlans de Svuizare influenzadis dai moviments dal “Mai francês”, lis poesiis di Leonardo Zanier cul so libri “Libars…di scugnî lâ”, cence mai dismenteâ il leam cun Fausto Schiavi. Di dut chest e je nassude la sezion taliane di “Pal Friûl” che e veve tai obietîfs il disvilup sociâl e economic dal Friûl, midiant des rêts di comunicazion e culture, par prime la nassite de Universitât dal Friûl. Lis gnocis cun Mina e la piçule Katia, lôr fie, a àn puartât Paolo a tornâ a Dartigne tal 1974, dulà che al cjapà la incarghe di rapresentant di “Pal Friûl” stant che la Regjon e veve scrit di pôc la prime leç su la emigrazion. Grant al fo il lavôr di assistence ai emigrants che planc a planc a scomençavin a tornâ e che, daspò dal taramot dal 1976, a tornavin a tirâ sù di gnûf lis lôr cjasis. I agns ‘90 a àn viodût l’impegn totâl di Paolo a pro dai dispatriâts cravuats e bosniacs scjampâts in Istrie par colpe de vuere in Jugoslavie e dai rifugjâts ruandês in Friûl. Passadis lis emergjencis “forestis”, Della Schiava al à decidût cun altris amîs di meti dongje i pontebans sparniçâts ator pal mont; al è nassûts cussì il grup “Pontebans tal Mont” par fâ cognossi e fâ tornâ a vivi Pontebe che, daspò de colade dal mûr di Berlin, e veve di tornâ a scuvierzi la sô vocazion. Tal 2005 “l’Ente Friuli nel Mondo” cun a cjâf Marzio Strassoldo, i à conferît la presidence de “Clape Friûl dal Mont” che lu à cjapât intune gnove ma no facile aventure, par dâ dignitât e jutori ai rimpatriâts e a chei che a àn voie di tornâ in Friûl. Il president de Clape però al è avilît e nus à dit: «Nô no sin stâts bogns di gjenerâ une mutue oportunitât leant il Friûl a chês altris comunitâts furlanis tal forest, anzit, vuê si cjatìn a fâ studiâ te nestre universitât i zovins che po a son obleâts a emigrâ come i lôr nonos». Il grant displasê di Paolo al è chel che «Dopo vê partecipât in prime persone a la Vierte furlane de fin dai agns ‘60 e ‘70 o sin tornâts a vivi la emigrazion come folclôr e nostalgjie che tant ur plâs ai sorestans». ■
Daniele Martina