MUSICHE. Ulisse e i ciclopi

Ju vevin lassâts parsore dal palc li dal parc dal Cormôr co a vincevin il Premi Friûl tal 2011. Doi zovinuts di Mortean, Ulisse e Moreno, vincj agns par om, dome une ghitare, une batarie e la vôs, che a cjantavin di fâ la rivoluzion. Ju cjatìn cumò cul lôr prin disc publicât cu la etichete Musiche Furlane Fuarte, “Ulisse e i ciclopi”. Non dal grup, non dal disc. Nol fâs une plee. Une mieze ore di musiche rock punk salvadie e intense, sunade dute intun colp «de une fint ae três di matine dal dì dopo», inte ambientazion bucoliche dal Mushroom Studio di Lunghet, a Frisanc. Doi dîs di Fevrâr intai boscs dal Friûl Ocidentâl dulà che «o vin sunât velocissims, o jerin un pôc gnervôs, e jere la nestre prime esperience serie», nus conte Ulisse, riduçant intune biele muse cu lis mostacjutis. Il risultât al è autentic e fuart, fresc e intens tal stes timp come la lôr etât. «Grazie ai operaris e a lis baristis. A la Basse FURlane. Ai cuei e a lis monts, al sporc Cormôr, al piçul Judri e al potent Tiliment cu lis sos fiestis sporcjis», a scrivin i doi tai ringraciaments dal cd. «Parcè che chel che al ven fûr di me», al zonte Ulisse, che al scrîf i tescj, «al riflet inevitabilmentri dulà che o vîf… A mi mi plasin lis stradutis de Basse, i siei cuei e i siei tramonts, ma ancje chi al è un par di balis, eh, dopo un pôc!». Velu ca, plen di sentiment, ancje se ‘ndi vûl un pôc par cjatâlu sot di che musiche in burascje, ma zero retoriche. La sô cjançon preferide “Larìn lontan” e fâs cussì: «Se o sin ducj insieme no nus fermaran/dulà che o rivarìn nol sarà impuartant/ma ducj insieme o vin di lâ indenant». Insieme, peraule che no si sint plui tant dispès. «Nol covente disperâsi», al dîs l’autôr dal test, «che si larà indenant in cualchi maniere, ma tegnintsi par man». Ancje chest lavôr musicâl al è fat tignint par man altris artiscj: si sint, propit su chest toc, il bas di Piotre, la armoniche a bocje di Fabian Riz in “Orarès scomparî”, il pian electric Wurlitzer di Paolo Paron in “Son masse” e Marco Coco in “Mediterraneo”. E po e je la vôs di Lussia di Uanis, poete furlane ma ancje mari di Ulisse, che in chest disc e à ancje scrit i tocs “Libar” e “Rivoluzion”. Ma no dome: «Lis primis cassetis che o ai scoltât a jerin lis sôs», al dîs Ulisse, «la sô influence su di me e je grande, ma ancjemò plui di chê musicâl lu è chê poetiche. Mi plâs il so grant bon pinsîr». Ma une parintât cussì no ise mai “pesante”? «No! Anzit, noaltris o colaborìn, o vin juste fat un spetacul cui fruts ator a sunâ e a fâ i monis in zîr». ■
Natascia Gargano