TV FRIÛL E CJANÇONS. Lu âstu viodût?

E son aromai plui di vincj agns che su Rai3 al va in onde “Chi l’ha visto?”, e in dut chest timp no si contin nancje lis personis scjampadis o sparidis che la trasmission e à judât a cjatâ.
Cun tant sucès che e à vude la formule, fâ une version ancje pe tv furlane e pararès une buine idee, no mo? E invezit no.
“Lu âstu viodût?” al jere stât studiât in ducj i detais, cuntune sole conclusion: nol pues funzionâ. La mancjance di suspance e di emozions e je clare fin dal prin moment, a scomençâ de mancjance di lagrimis in direte (i furlans no fasin comediis par television!).
Provait a imagjinâ la ricostruzion de vite di ogni dì de persone sparide: cjase-lavôr-cjase. Une stufe che cui che al sta devant de television al cambie canâl e si cjale pluitost un campionât di curling.
Lis indagjins? No duraressin plui di cinc minûts. Dulà puedial jessi scjampât un furlan? Tal ort, in fabriche o a viodi l’Udin. No vâl nancje la pene di mandâ un gjornalist a investigâ tant ator.
Lis telefonadis di cjase? Nancje une: i furlans a stan tal lôr, cence lâ a cjalâ cui che a viodin, e dut câs, ancje se a viodin alc di strani no van sigûr a contâlu a ducj in direte.
E fin chi la trasmission e sarès durade dîs minûts, e ancje a strachis. Ce si podaressial zontâ? Dôs intervistis a cui che a cognossevin la persone di cirî. Ma ancje chi, lis rispuestis a saressin dutis compagnis: “Si, un bon om. Un lavoradôr”. E vonde li. Dodis minûts in dut.
Al è clâr che “Lu âstu viodût?” nol podarès mai deventâ un program di sucès.
Soredut pe conclusion des indagjins, che e sarès simpri compagne: dopo un cuart di ore, al clamarès in trasmission il paron de ostarie in place: “Al è chi, no stait a cirîlu. Ancjemò un taiut e al torne a cjase”. ■
BETE DI SPERE