IL SIVILOT. Preparant lis elezions…

Al somearès che ducj i politics di chenti a vedin passât l’Istât a studiâ programs eletorâi e gnovis struturis aministrativis par freâ miôr il Friûl. Di sigûr lu àn fat in rive al mâr parcè che nol è un che nol sedi abronzât.
I triestins, a dîle dute, a àn chel biel colorît fintramai di Avrîl, di cuant chel si pues lâ a studiâ a Barcola, ma ancje i nestris, se no àn lis rivis, cualchi lampadute le cjatin di sigûr.
La plui in forme e je la “Serachianute” che une volte decidude la candidature, ogni dì e tire fûr une propueste: vuê i tocje a lis Provinciis, doman a lis bancjis, passant doman a lis feradis. Nuie ce dî: un program nassût dal bas e cul confront cu la base, soredut i bagnins, i camarîrs e i mestris di nuoto.
Dal rest ancje Illy, prime di deventâ president, no vevial lavorât propit come mestri di schi?
Sino o no sino, come che e scrif la Serrachiani par promovi il turisim, un teritori dulà che intune ore si va dai monts al mâr?
Pecjât che cheste vision si fermi a une brochure di viaç e no sedi invezit un sburt a pensâ chel benedet teritori tant che un sôl paîs che si clame Friûl.
Ma domandâ une robe dal gjenar sot dal caligo di Feravost al podeve fâ vignî un colp a plui di cualchidun. Al è miôr fâsi un bagn. ■
L’OM DI BURI