LA FABRICHE DAI… LIBRIS. Sclopetadis in trê riis

I Colonos di Vilecjasse a san fâ pensâ, cognossi e ridi; une “grampe” di tantis robis che no je butade li a câs. Di fat, ai 27 di Avost a àn dât un esempli dal lôr sincretisim culturâl, proponint intune serade la premiazion dal concors che si ten ormai di trê agns, “In trê riis”, ven a stâi mostrâ la capacitât de lenghe furlane di esprimi in struc une conte, a dimostrazion di jessi un imprest che al pues dî la sô ancje te ete dai sms, ven a stâi une lenghe buine di cjaminâ cui siei timps. Une idee nassude de creativitât dal scritôr francês Felix Feneon e metude adun te suaze culturâl dai nestris dîs. Un concors che al à puartât a vê chest an un totâl di 44 contis (te prime edizion a jerin 25). Il prin premi te sezion fin a 16 agns al è stât vinçût di Alex Cordenos di Sedean, cu la conte “Un Innocenti da la Toscane”. Te seconde sezion, fin ai 35 agns al è stât premiât Francesco Clocchiatti di Udin, cu la conte “Ae sagre”. Premi de jurie a Rosa Puntel di Paulâr, cu la conte “Setantesîs” e a Loriano Vallar di Cjavàs cu “Pujesi e sgjambers”. Jenfri di sîs finaliscj ancje Michele Calligaris di Romans di Gurize e Rosa Savani di Lavarian. (Da pît o publichìn la conte dal autôr plui zovin). Te stesse ocasion al è stât presentât il cd “Sclopetadis!”, cul sot titûl “100 ridadis sfulminantis par furlan”. No je une staiarade butade li, ma une cerce di ce che si podeve cjatâ ta lis ostariis di Udin tal prin tacâ dal ‘900, indulà che lis barzeletis, la musiche e la lenghe a davin un savôr particolâr a chel cabaret nostran, fat di ritmis che a dan propit la idee di jessi sclopetadis. Trê i protagoniscj principâi: Grimaz, Somaglino e Tolazzi, compagnâts dal Teatro Incerto di Fantini, Moretti e Scruzzi. Une cerce di bon stâ e di culture popolâr che e cjape savôr vuê come îr.
Un “INNOCENTI” da la Toscane al à maridât une “CECCHINI” dal Friûl. Cumò a son a stâ dongje di me… tal “BORC DI UERE”! No crodêso? E je vere! (Alex Cordenos)
Mauro Della Schiava