ASSOCIAZIONISIM. A rivin i Furlans dal Gurizan

Tal Friûl di jevât al è nassût un gnûf sodalizi: la Associazion Furlans dal Gurizan. La presidente e je la siore Isa Dorigo di Gurize, che culì nus conte cemût che si à metût adun cheste associazion.
«La necessitât di vê une rapresentance spontanie dal Friûl orientâl pes cuestions identitaris furlanis si la sintive di tant timp, ma il prin che al à cirût di stiçâ lis boris al è stât puar Arnalt Baracêt, che o ai cognossût tal 2007 a Triest, tes zornadis che si veve di votâ la leç 29 su la tutele e valorizazion de lenghe furlane. In chê volte lui al jere dentri tal Comitât pe Autonomie e pal Relanç dal Friûl, ancjemò vuê vivarôs, che o ai vût frecuentât di chê volte indevant. Dopo un an o soi rivade a ingrumâ un piçul trop di int che al à tacât a cjatâsi, clamât dongje par cirî di fâ alc cuintri de eliminazion de sede di Cormons de Universitât dal Friûl, ma no sin rivâts a fâsi sintî. Par un biel pôc la robe e je restade ferme.
Tal Gurizan la necessitât de comunitât furlane e je chê di rivâ a la paritât cun chê slovene, rivant al lôr nivel cence gjavâi nuie. Cussì, stant che il president de Provincie Gherghetta, vie pe campagne eletorâl pal so secont mandât, al veve prometût di meti in pîts une Consulte pe minorance furlane compagne di chê slovene, o crodevi che nol sarès plui stât il câs di cjatâsi fûr vie par fâ la vuaite e fâ puartâ indevant i nestris dirits.
Chest an, invezit, int dal gurizan e à tacât a scrivisi suntun forum internet dulà che o jeri presinte dal inprin ancje jo. Impuartant al è stât ancje il coinvolziment e il jutori di Franco Braida, il dean dal Fogolâr di Monfalcon. Intun pâr di mês, si à decidût di tacâ a cjatâsi e cussì in Lui a son nassûts i “Furlans dal Gurizan”, che mi àn elezude a presidente, cul assum di tignî cont e promovi lis nestris lidrîs identitariis di furlans gurizans.
Come prime robe, si sin fats sintî daspò de cunvigne di “Ente Friuli nel Mondo” a Gurize, daspò o vin cirût di rispuindi su la stampe a une schirie provocazions, che magari cussì no, pai gurizans che a fevelin une lenghe minorizade a son une vissie che daspès e ven taçade. Cumò o stin sburtant la APT par rivâ ae paritât cu la lenghe slovene tai traspuarts publics.
Tai pôcs mês de nestre esistence o sint tai socis morbin e determinazion, e ancje tante simpatie nus rive di une vore di int e di altris clapis. O vin screât un sît internet e pagjinis sui social network che a saran il canâi pes nestris ativitâts, lait a viodi. ■
____________________________________
CONTATS
WEB www.furlansdalgurizan.eu
MAIL info@furlansdalgurizan.eu
FACEBOOK www.facebook.com/FurlaansDalGurizan
TWITTER www.twitter.com/FurlansGurizans
Redazion