30 AGNS di Kappa Vu

Ae fin dal 2017 la Kappa Vu Edizioni e fâs sîs lustris di ativitât de nassite e publicazion dal prin volum Cjantis e rimarolis pai frutins. Intal 1987, Alessandra Kersevan e Giancarlo Velliscig (titolârs de cjase di edizion) a àn inventât un test in lenghe furlane par fruts e frutis cuntune schirie di motîfs, cjançons e filastrocjis origjinâls acompagnadis des bielis ilustrazions di Altan. A chel timp, cheste decision e jere cuintri il pinsîr comun che al voleve limitâ la difusion de lenghe e proibî il so utilizi. Il lôr progjet, comissionât de Universitât dal Friûl in gracie de professore Silvana Schiavi Facchin e finanziât de Comission europeane, al jere une iniziative pal inseriment sperimentâl dal furlan te scuelis de infanzie e dal prin cicli des elementârs. Un lavôr che al à continuât a jessi doprât vie pes gjenerazions e cumò al è in formât pe sachete; in chê volte compagnât di une cassete, vuê di un cd.
«Il trentenâl al è stât il Setembar passât, ma no sin ancjemò rivâts a festezâ. O sperìn di podêlu fâ a Dicembar – nus conte Alessandra – cu la ocasion di cjatâsi insiemi cui nestris autôrs, amis e letôrs e di viodi ce che o vin fat fin cumò».
In dut, i titui dâts ae stampe a son plui di dusinte, e chest al fâs de Kappa Vu une des realtâts editoriâls plui prolifichis, impuartantis e di lungje vite de regjon.
✒ Sara Palluello