Sfuei Mensîl Furlan Indipendent
Archivi de Patrie

1949

Enos Costantin

Une anade cence contribûts regjonâi

1949, m1949, mil nûfcent e corantenûf, une date, une anade che no à nuie ce viodi ni cun Lenart, chel di Vinci, ni cun Dante, chel di Florence, ni con Pieri Pauli, chel di Cjasarse.
E alore?
E alore nuie. No si puedial tirâ fûr un an cence pratesis di vê contribûts regjonâi?
E, po, al sarà ben sucedût alc ancje tal 1949, no mo?
Ma nancje di dîlu! In chel an al è saltât fûr il Strolic furlan pal 1949 de Societât ilologjiche furlane. No sarès chê grande novitât se no lu ves metût adun Josef Marchet: us parial pôc? Dissens di Fred Pitin e di Toni Menòs e colaboradôrs di biele vignude pe nestre culture: Bernardin (Dino) Virgili (al veve 24 agns), Novele Cjantarute (e veve 29 agns), Lelo Cjanton (al veve 27 agns) e chel Pieri Pauli Pasulin che al veve 27 agns; plui altris che, in chê volte, a vevin benzà un non.

La cuviertine dal Strolic furlan pal 1949. La Filologjiche e veve 30 agns, La Patrie dal Friûl a pene 3 agns e jo o soi nassût in chel an, come la nato, Risultive, Pecos Bill, la Republiche popolâr cinese e il Sot la Nape: ce tancj coscrits!


◆ Cussì la “signorine” di citât: “Oh, se te savessi, Bice, cosa che gavèmo ridùo ieri sera là via dela Rosina, che ‘sera vignùo anca l’Angelin e il Franco… Ti sa, quel spilungon risso…”.
◆ O une mari, di chês che i fevelin par talian al frut e i sberghelin cussì: “Cicci, tira su quelle tiracche, che ti cascano i bregonetti […] Sei stato a tombolare nel cortile, nomo? Guarda lì che ti sei tutto sclipignato…”.
◆ E un di Udin, di chei che a fevelavin ancjemò… par furlan, ma che nol veve tant chê di paiâ lis tassis: “Come ise, come ise chiste? Se intindial di significà lui, cun chistis espressions equivochis! Ca si fevelave di impuestis e no di partîs. Ohè, digo!… Se mi fasial a mi che la man che mi strosse e sedi la man di un fassist o di un comunist o di un democristian? Quando che son per tera, son per tera, no? […] E po’ lis assicurassions, la previdense sociâl, i contributi, la cassa malatìa, la tredicesima mensilità e il diaul che ju puarti […] E dopo e je la tasse di esercissi, la lisense, la ricesse mobil, la complementare, la tasse su l’entrade, el fit, la lûs, i francoboi su la corispondense, la tasse su la insegne, la tasse famee, lis tassis comunâi, la tasse su lis scovassis, ch’al toce pajâle e po’ nissun ven a ciolilis… […] E soresere, boe di un mont, o ai ance un poce di sêt! Sicuro! Dopo une sornade interie daûr dal banc a contratà, a discuti, a lesinà il sentesin, a sacramentà, no se galo dirito di resentar il gargato? Ala salute!”.

Il mês di Zenâr come che lu à viodût Fred Pitin pal Strolic furlan dal 1949. Lâ a urî aghe tal poç cul buinç e cui cjaldîrs, intun mês di crût, lavôr che ur tocjave aes feminis, al jere ancjemò normâl tal 1949. Par furtune cui agns Cincuante e i acuedots, e la sburtade dal boom economic, o vin vût la aghe in cjase. Prime nome un rubinet tal curtîl, po un rubinet in cjase e, po, aghe cjalde e frede tante che si voleve, parfin par lavâsi di plante fûr ogni dì.

◆ A son tant plenis di atualitât ancje lis “Letaris cence rispueste” che Marchet al scrîf a int che no je plui. Al tache cun missâr lu cont Ermes di Colorêt: “se al tornàs in chest mont in dì di vuê, tal secul de libertât e de democrazie, de Gjespe e di Rite Hayworth, garantide che nol resistarès un’ore…”; po si indrece a done Zilie Cumine, sô basave: “Noaltris di cumò, cui nus puedial passi e colmenâ? No vin une cjase nestre, no vin amôr pe tiare, o lassìn la canae in man es maestris, no savìn preâ ne pai vîs ne pai muarz. Il nestri pinsîr al è une machigne di calculâ, il nestri fevelâ une ruvîs di numars, il nestri mont un davoi di ruedis, il nestri vivi une gjostre ator de tiare. No cognossìn rimuars parcé che no vin cussienze; no sintìn nostalgìjs parcé che no vin ne patrie ne cjase; no podìn tradî parcé che no vin zurât ne amôr ne fedeltât a nissun […] o mangjn pensant al presi de pietanze, si olìn ben cul orloi in man […] Un amôr disfurtunât e un dolôr di dinc’ nus disturbin chel istes”. Lis “Letaris cence rispueste” si sierin cun sâr Pieri Zorut dulà che, ancjemò une volte, Josef Marchet si sbroche sul dialet “udinês”: “Al è une messedanze, un panadòt, un tocjo di peraulis furlanis che finissin par talian, di peraulis padoanis che finissin par furlan, di gramatiche puliese, di stilistiche sclave tamesade fûr pal triestin… La vanguardie de ziviltât, sar Pieri!”, par concludi cuntune analisi sociolinguistiche: “La Furlanie, sar Pieri, e je deventade sudizionose: no olse mostrâ la sô muse, no si ten in bon se no met intorsi i vistîz di chealtris, no crôt di fâ figure se no simiote il fâ e il fevelâ dai vizins e dai lontans. Ce uelial? Debulezzis! Ai siei dîs a jerin i siôrs e i studiâz che no si tignivin apajâz di doprâ il lengaz de plebe: in uê, a Udin a son juste quatri studiâz che si ustinin a tignîlu in vite, indulà che la ratatuje di mieze bigogne lu disdegne e lu bandone ad implen. E se qualchi volte si disbasse a doprâlu cu la cojarìe, Marisante sar Pieri, ce mignestre! Il so furlan, il furlan sclet e vivarôs dai siei vincjequatri Strolics al è bielzà deventât une antigae. E Lui al sarès intrigât a fâsi capî pulît dai zitadins di cumò cun chel lengaz”.
◆ Po ben, chel al jere Josef Marchet tal 1949. Ma parcè disino che Pasulin al à stât un profet? Marchet al veve mangjade la fuee ancjemò prime su ce che e sarès deventade, e e jere benzà deventade, la nestre civiltât.

Il mês di Jugn tal Strolic furlan dal 1949 come che lu à dissegnât Fred Pitin. In chel an il Friûl al jere ancjemò plen di vacjis e in Jugn al jere il fen di fâ, la prime tose, che si clamavile “culture”; po il forment di seselâ, il lat di puartâ, i fasûi di samenâ, lis vîts di solfarâ… insome, pôcs di lôr a rivavin adore di lâ in “vigjelature”, come che si strambolotave in chê volte. Dopo, cu la vigjelature, e je rivade a slacs ancje dute chê massepassudagjine che cumò si tache a paiâ. Josef Marchet tes Predicjis dal muini e il Pup, cui siei Si fâs par mût di dî nus vevin visâts.

◆ Sierìn chescj sprocs cun ce che al à vût scrit Lelo Cjanton tal Strolic furlan dal 1986: “Al è lui [Josef Marchet], tra l’altri, l’autôr di chel Strolic pal 1949 ch’al à segnade la saldadure tra ce ch’al restave dal Friûl di une volte, cressût tor del Filologjche, e chel gnûf, rivoluzionari, dai zovins”.
Tal 1986 a jerin passâts 20 agns de muart di Josef Marchet; il Comun di Glemone, patrie dal grant studiôs, i à intitulât une vie, une viuce, nome tal 2001, trentecinc agns dopo de muart, forsit parcè che in chel an la Filologjiche e tignive il so congrès venti sù.

Sot la Nape
– Strolic di ca, Strolic di là, mancje nome che tu nus tiris fûr il Sot la Nape! – Sigûr che lu tiri fûr! Une des leturis plui bielis e je chê di lei i Sot la Nape, chei vieris, che al è dut ce imparâ dal Friûl prime che al deventàs un raspiç lenghistic tacât de “Venezia Giulia”, un coronim che, come la isule di Peter Pan, “nol è”.
Tant par dîus: il prin Sot la Nape che mi è rivât a cjase al è il n. 4 dal 1966, chel fat “in memorie di pre Bepo Marchet”. Che, po, jo mi jeri iscrit a la Filologjiche un pieç prime, ma si viôt che o jeri masse zovin e in vie Manin no mi consideravin. Une dì mi soi cjapât sù e, cu la coriere di Olivo, o soi lât jù a Udin e la segretarie de nestre plui amade istituzion culturâl, dopo un control, mi à dit che “va ben, la riviste ti rivarà”.

Chest al è il prin Sot la Nape che mi è rivât a cjase: numar 4 dal 1966. Mi plâs fâlu viodi parcè che al è un ricuart di Josef Marchet, un furlan che pal Friûl al à fat dut ce che al à podût, e ancjemò ancje.


◆Al è un dai plui biei ricuarts di zoventût che mi restin: o jeri sul pecol di Pra di Cuestas e di là sù o ai viodût il puestin che al rivave a cjase mê. O sei vignût jù di buride, fasint varcs pai trois e ancje fra un troi e chel altri, sbrissant cul cûl sui prâts di lescje li che a son plui ritês, par cjatâ il prin Sot la Nape de mê vite.

1949
Al samee che la storie dal Friûl e sedi nome Celtis, Romans, Langobarts e Patriarcjis… E sarà ancje vere, no dîs di no, ma nô, i furlans di cumò, o sin fîs de NATO (North Atlantic Treaty Organization) e de Vuere Frede, de Curtine di Fier, dal plen di benzine in Yugo, des servitûts militârs e de Democrazie Cristiane.
◆ – E sarà vere par te – mi disarà cualchidun – ma i fruts di cumò, e ancje i fantats e ancje i frutats a son rivâts dopo di chei catans li –.
Ma no stait a fâmi ridi un voli che chel altri al vai: mai come cumò la NATO e à panze di gugje e i democristians a son dentri di ogni partît talian.

Bol francês pai dîs agns de nato (pai francês otan). In chê volte e veve ancjemò la sede a Parigji tal palaç che si viôt tal bol, ma cun De Gaulle, che al veve un fregul in asse chês americanadis, i americans a àn scugnût cjapâ sù i lôr catans e stramudâsi a Bruxelles. Nô furlans o sin restâts dentri te Organization ma, ce volêso, invezit di De Gaulle o vin vût Jacum dai Zeis.

◆ La NATO (North Atlantic Treaty Organization, o ai gust di tornâ a disglimuçâ l’acronim), tant par dî une, e je nassude a Washington DC ai 4 di Avrîl dal 1949; e je une siore di sgrimie cun 73 agns sù pe schene che no vûl savênt di lâ in pension. Cheste North Atlantic Treaty Organization e jere nassude, dissè jê, cun chê di difindinus e, simpri cun chê, e veve tirât dentri ancje il Friûl. Chenti o vevin ogni sorte di grabatui belics poiâts ca e là in spilugnis e crignassis par fermâ la Armade Rosse. Cumò, dopo incà che la Armade Rosse si è sfantade di bessole, o vin a sotet, a Davian, di chês pirulis che, se a vessin di petâ un ton, nissun Diu nus vuardarà. Nol restarà nuie dal Friûl; pe Vignesie Julie nissun fastidi: al è un coronim virtuâl.
◆ Però visinsi: cuant che la NATO e jere a pene te scune, la Societât filologjiche furlane e veve 30 agns sul copin.
◆ Dal 1949 al è nassût Pecos Bill, chel talian. Jo o speravi simpri che mê mari mi compràs chel fumut, ma la siore e sintive pôc di chê bande. Dut câs, ogni tant si combinave, ancje parcè che Pecos Bill no i displaseve a gno pari: jo no savevi ancjemò lei che lui al tacave cun “giddap Turbine”, e mi puartave ator pal Texas cun messicans e indians, sù e jù a cjaval par chei sdrups, passant riulats rabiôs, simpri tai pericui par fâ trionfâ la justizie!
◆ Il prin di Otubar dal 1949 e je nassude la Republiche popolâr de Cine; viodêt, mo, cetantis robis in chel an. Po, di frut, o sintivi pe radio che i cinês a bombardavin lis isulis Quemoy, e Taiwan le clamavin ancjemò Formosa. Cheste peraule, Formosa, simpri di frut, vadì parcè che o leievi Oggi e la Domenica del Corriere, mi dave la idee di une femine tetone.

Bol pe nassite de Republiche popolâr cinese. I cinês no lu san, ma in chel an e je nassude Risultive e la Filologjiche e à dât la scree al Sot la Nape; mi displâs par lôr, pai cinês o intint, e lu dîs cul cûr, ma al è ancje l’an che i americans a an metût sù la nato.


◆ Dal 1949 e je nassude Risultive, che biel moviment leterari dut furlan, dulà che Josef Marchet, simpri lui, al à poiât ben pulît la sô grife. E a tornin i nons di sore vie: Virgili, Cjantarute, Cjanton, cuntune prionte formidabil: il Pup. Il Pup al è stât il plui vêr, vîf, vivarôs, ancjemò (e simpri!) atuâl scritôr furlan di lenghe furlane. Un Quino di chenti che al disegnave scrivint.
Dant un cuc al belanç de Societât filologjiche furlane dal Dicembar 1949 o viodìn che il Strolic furlan al à costât 202.413 francs (in chê volte o vevin ancjemò i francs) e che di publicitât al à reonât 240.000 francs, cuntun util di 44.587 francs. Si previodeve, po, che lis venditis a varessin procurât almancul altris 100.000 francs. Criteris modernis, che Goldman Sachs nol varès savût fâ di miôr.

Borc di Curiûl 1949
No par dî, ma tal 1949 o soi nassût ancje jo. A Osôf, tal Borc di Curiûl, te cjase di Franz Polente, a un cuatri pissadis di cjan de roste dal Tiliment, no lontan dal lavadôr e de glesie di Sante Marie ad Nives, tacât dal fossâl che vie pal Istât al beverave cjamps, vîts e prâts dilunc de strade di San Martin par lâ te Selve… un lûc che plui biel no podevi sperâ par nassi e dulà che o ai passât, o ai gjoldût, i prins agns di frut fevelant par osovan…

Dissen di Zuan Napoleon Pellis pe cuviertine dal Sot la Nape numar 2 dal 1949. La riviste de Filologjiche, che e ten ancjemò bot, e je nassude in chel an, come Risultive e la Republiche popolâr cinese. La Patrie dal Friûl, il sfuei, al è nassût prime, parie cun la Republiche taliane.

La gote de mîl
… vegnarès a stâi dulcis in fundo, ancje se la gote de mîl e jere chê dai fîcs che, sul vignî de Sierade, cul prin ingrisigniment e i prins sgrisui, a jerin un goloset di fruts e di grancj. Po ben, dut chest par dîus che dal 1949 la Filologjiche e à dât la scree al Sot la Nape.
E La Patrie dal Friûl?
Ignorants!
La Patrie dal Friûl e je nassude prime di me e prime de NATO, prime di Pecos Bill e prime di Risultive: e je coscrite de Republiche taliane!
◆ Ma ancje li, te Patrie, no te Republiche taliane, al à poiât la sô çate chel glemonat che al veve non Josef Marchet. ❚

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +