Sfuei Mensîl Furlan Indipendent
Archivi de Patrie

1914-2014 CUINTRISTORIE DE VUERE GRANDE. Violence etniche

Agnul Floramo

La nestre “cuintristorie” de prime Vuere Mondiâl. Une grande tragjedie che e à puartade la muart di tante puare int, e che in Friûl e à metût furlans cuintri furlans in non di decisions cjapadis parsore dal lôr cjâf. Lis storiis che la retoriche dai Stâts nazionâi no à mai contât. 8e pontade

Oswald Überegger, un dai storics contemporanis di lenghe todescje plui atents a sgarfâ fûr informazions su di une storie intindude plui tant che sudôr e sanc dai popui che tant che apologjie dai potents, o orgasmiche esaltazion dai gjenerâi e des bataiis, nus à di pôc regalât un studi cetant biel e sistematic su lis atrocitâts fatis vie pe grande vuere dai esercits che a combatevin in Europe. Te sô introduzion, nus ricuarde che la storie de violence inte prime vuere mondiâl – intindude tant che storie de violazion dal dirit dai popui, dal dirit consuetudinari o, plui in gjenerâl, intes formis di vuere civîl, maçalizis, deportazions, violencis, lavôr sfuarçât – par masse timp no je stade di nissun interès ni public ni sientific. Bisugne spietâ il principi dai agns Novante dal secul a pene finît par cjatâ autôrs europeans tant che John Horne e Alan Kramer, che si son ocupâts in particolâr di ce che i todescs a àn fat in Belgjiche e in France. Un at coragjos e seri, cun tant di dâts, di nons e di responsabilitâts. A son po dopo rivâts i studis su ce che a àn fat i rus dal zar in Galizie. Dimostrant che daspò i grancj maçalizis di Charleroi, de Marne, di Tannenberg, de Masurie, a forin adiriture i plui alts cuadris militârs a incoragjâ i soldâts a cjapâsi cualchi sodisfazion cu lis feminis di chês regjons. Lis lôr oparis a son stadis tradusudis intes lenghis principâls dal mont dome tai prins agns dal Doi mil, e a àn fat scaturî dute une schirie straordenarie di altris aprofondiments, puartâts indevant in chescj ultins agns dai storics plui zovins e inovatîfs dal moment. Mi à plasût cjalâ cun grande atenzion la bibliografie che Überegger al à preparât. Si trate di un elenc di monografiis che al fas pôre: libris vignûts fûr a scomençâ dal 2001 a Baden Baden, Londre, Bruxelles, Munic, New York, Viene, Parîs. E o podarès lâ indevant cirint jenfri une bibliografie lungje plui di vincj pagjinis. Centenârs di titui, un plui dûr e fuart di chel altri, come “Il stupri de Belgjiche”; o ancjemò “Vuere Etniche”; o “Lis atrocitâts dai Todescs”. E la bibliografie taliane? Là sono i studiôs preparâts tes universitâts nostranis? Pôcs, ancje se une vore biei, i lôr aprofondiments, e ducj in cuintritindince, ma in particolâr cuasi ducj contignûts intun sôl libri, chel curât di I. Basso Ermacora su “La memorie de Grande Vuere”, vignût fûr a Udin tal 2001, là che si cjatin contribûts impuartantons come chel di B. Bianchi su lis violencis cuintri la popolazion civîl, e chel di P. Svoljsak su la soference de “Popolazion civîl de Slovenie ocupade”. Un libri duncje. Dome un libri, un sôl, su chest teme che invezit al pâr une vore impuartant par meti in evidence il vêr sens ultin e finâl de ideologjie che e steve ae base de grande vuere: il spirt nazionalistic esasperât. E je vere: la Italie e fo probabilmentri la prime nazion (al sarès miôr dî il prin stât) a domandâ di vierzi une comission di inchieste inmaneade – atenzion al non, che al è dut un program – dal “Ufficio Tecnico di Propaganda Nazionale”. Il lavôr al fo dal sigûr straordenari, detaiât, onest e precîs, stant che al fo sierât intal zîr di une desene di zornadis: e di fat, la Comission si è riunide ai cuatri di Novembar dal 1918, zornade simboliche de gloriose Vitorie, e ai cutuardis di Novembar dal stes an e à sierât i siei lavôrs! Ce session fadiose! Il titul al è emblematic: “Il martirio delle terre invase”. Là che si cjapin in esempli particolâr lis violencis sessuâls cuintri lis feminis talianis par opare dai soldâts gjermanics. Ma no volarès jessi masse tendenziôs. Za cheste rubriche e puce di cuintristorie, e duncje cualchi benpensant, cualchi “anime biele” ispirade di sintiments patriotics fedêi ae bandiere dal tricolôr e podarès simpri ricuardânus che jenfri il 1920 e il 1921 la preseade “Reale Commissione d’Inchiesta” e à produsût in doi agns siet volums di ricercjis, e che il cuart volum al à un cjapitul che si intitule nuie mancul che “Delitti contro l’onore femminile”. Clâr che a son esponûts dome i câs di feminis talianis violadis dai Bosgnacs, dai Cravuats, dai Slovens, dai Ongjarês, chê marmaie barbariche “muche e cruche” che fin dai timps de glorie di Rome e de sô civiltât lusinte e veve smaniât par bevi il sanc dal popul latin. Feminis talianis, fiis, maris, sûrs, cjar di becjarie di chê rabie todescje o sclave che e cirive di svindicâsi cun viliacarie cuintri lis feminis di chei oms che a combatevin intes trinceis. E al è clâr che il rapuart al finìs cuntune precise domande di risarciment finanziari. Velu li, dut il probleme. Cun dute onestât, no soi rivât a cjatâ fûr nissun libri che al fevelàs de violence fate dai francês in Alsazie o, tal nestri câs, dai talians in Friûl. Al contrari, la documentazion su ce che i “nemîs” a àn fat a Cividât, a Trep, a Remanzâs, a Codroip, e je vivarose, in gracie de documentazion tirade dongje – e a la svelte – dal stât maiôr talian tal 1918. Câs trements, dome di condanâ. Ma, par ecuitât storiche, e par rivâ a comprendi miôr la culture de vuere, cussì tant celebrade in chescj mês, bisugnarès vierzi ancje chel altri cjapitul, dut di scrivi, dismenteât tai tancj scansei de vergogne che aromai a stropin l’archivi de storie dal stât talian. Che nus conte di ce che lis feminis a àn patît par colpe dai “regnicui”. Bisugnarès fâ un censiment dai tancj diaris dai predis de Valcjanâl, o di chei des Vals dal Nadison e vie dilunc fin a Cjaurêt, e a la aghe dal Lusinç. Vierzi i archivis parochiâi. Parcè che al è clâr che nissune comission di inchieste e à mai intervistadis lis feminis di chei paîs che a jerin Austrie fin tal 1919 e dopo a son deventâts talians. Cuissà mai ce che al sarès vignût fûr. Il brâf predi di Ugovizze, pre Mario Gariup, tal so studi su la Valcjanâl jenfri lis dôs vueris, vignût fûr bielzà tal 1993 ma cence scjas – anzit, cuasi taponât de storiografie uficiâl -, al puarte une documentazion impuartantone. Al ricuarde par esempli lis peraulis dal tenent gjenerâl Piacentini, comandant de seconde armade, che ai nûf di Avost dal 1916 si glorie che chel al è il moment di fâ valê “la qualità della nostra razza”. Une afermazion che e fas vignî i sgrisui. Ise stade o no une intenzion volontarie di inseminazion de raze taliane doprant la violence su lis feminis dai paîs ocupâts di bande taliane? Dificil pensâ che il soldât talian al sedi stât diferent di ducj chei altris, ancje se te imagjinazion popolâr al ven simpri piturât tant che un bonpaston che al odee la vuere e al à miôr sunâ il mandulin e mangjâ i macarons. Il rivuart des feminis a fevelâ di cierts argoments, la reticence dal esercit vincidôr, la vergogne des fameis, il ricat dal gnûf stât tai confronts dai gnûfs sudits al à taponât chel trement “stupri etnic” che cualchi storic coragjôs al varès di cjapâ in serie considerazion par un cuadri plui onest e obietîf di chest altri episodi vergognôs e disuman che la nestre storie Patrie e à vût di subî di bande dal imperialisim talian. ❚
Angelo Floramo

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +