L’Istitût Ladin Furlan Pre Checo Placerean, par ricuardâ i 100 agns de nassite dal pitôr Otto D’Angelo, al à inmaneât une mostre su lis sôs oparis in vot diviers lûcs dal Friûl.
◆ La prime mostre e je stade fate te sede dal Consei regjonâl a Triest tal mês di Fevrâr, la seconde a San Vît di Feagne ae fin di Mai, cun grande presince di public, e la tierce si tignarà a Davâr dai 21 al 30 di Lui.
◆ La cuarte mostre e je in program a Spilimberc pe fin di Setembar, te sale espositive de scuele mosaiciscj; po dopo, e sarà la volte de sede espositive dal Comun di Trivignan, a Clauian, ae fin di Otubar.
◆ La seste mostre si fasarà te sede de biblioteche dal Comun di Cjasarse dai 10 ai 20 di Novembar, la setime tal cjistiel di Colorêt di Montalban dai 22 ai 30 di Novembar, e la ultime a Tarcint, dai 8 di Dicembar ae fin dal an.
◆ Lis mostris a sono dutis diferentis: par ogni zone si viodaran cuadris e moments di vite dal Friûl dal inizi ’900. Un lavoron che Otto in agns e agns di lavôr al à regalât al Friûl, lassant une documentazion incredibile. In ogni mostre si podaran viodi ancje centenârs di dissens che l’artist al à fat tant che publicist, e i fumets che al dissegnave in France, indulà che al jere emigrât. ❚
100 agns de nassite dal pitôr Otto D’Angelo
Geremia Gomboso