EDITORIÂL – E je ore di sentâsi in taule

Sul numar passât de “Patrie” o vin publicade la letare di Marco De Agostini, segretari dal Mf, a Tondo e mi somee che par chel che al tocje la cuestion de lenghe, i vedi ben rispuindût Carli Pup. A mi invezit mi fâs gole une altre cuestion: chê dal disconzelament. Marco al dîs che e je stade une gruesse falope tirâsi fûr de bataie politiche par tancj ains, si che duncje i autonomiscj no àn podût jessi presints tes discussions in Regjon.
Cheste no je dute la veretât. Disìn pluitost che il Mf no è stât presint se no par cualchi “macacade” eletorâl. Ma si à di ricognossii il fat de autocritiche, che no je mai facile e che e je simpri sinonim
di coraç. Ven a stâi, anìn indenant e fasìn tesaur des peraulis e de buine volontât
dal Mf.
Ma puedie jessi avonde cheste dimostrazion di intents?
Partìn duncje di ce che al vûl dî “disconzelâ”: si tire fûr un alc che o vin metût te glacere par doprâlu. Se e je la paste dal pan, e vûl metude tal for par fâle jevâ, se al è un toc di cjar al va saurît, cuinçât e butât su la gridele o te padiele, in sumis, in ogni mût al va scjaldât e doprât. Se al reste li al va di mâl in pôc timp e soredut, no tu puedis tornâ a glaçâlu,
al va frait.
Se duncje al devente bon di gustâ, si à di parecjâ une taule e scomençâ a pensâ ai invidâts. Un partît, un moviment disglaçât no je robe di pôc o che si puedi gustâ di bessôi: al è come vê metût vie un vidiel, no une brusadule.
L’invît al va fat pardabon par prin a chei che no son restâts conzelâts in chei agns achì. Forsit no saran chei che plui a plasin, ma intant che il Mf al veve masse frêt, chei chi, comitâts, grups, gjornâi, ancje personis di bessolis, la bataie pal Friûl le àn puartade indenant, a àn mostrade la muse ancje se il “vecjo pari” no si cjatave plui li ator.
O crôt che in tancj a vedin nasât il profum de mignestre tirade fûr dal conzeladôr, cumò al è il moment dai invîts e tocje al paron di cjase spedî la letare. Cuntune avertence clare: dopo tant timp nol esist il dirit de primogjeniture, vuê al esist dome il Friûl e la bataie dal so popul pe autodeterminazion.
O voi plui indenant: o crôt che lis tesis, il program dal Mf, a sedin buinis ancjemò, tant a dimostrâ purtrop che lis condizions di sotanance dal Friûl no son cambiadis masse.
La taule si pues duncje prontâ, ma lis cjadreis a àn di jessi dutis compagnis e a cjâf de taule si sente il paron di cjase, ma dome par creance, no par dirit.
Nol è tant dificil, nol è che la famee e sedi une vore numerose. E pues cressi di sigûr, ma pal moment al sarès avonde almancul sentâsi e cerçâ se il plat disconzelât nol a pierdût sostance. ■
DREE VALCIC