La Patrie dal Friûl e salude Arnalt Baracêt
Cuant che mi colpìs un grant corot, a mi no mi ven di vaî: mi si ingrope sù dut. E par solit mi met a fâ e pensâ alc altri. Anzit, fâ, parcè che il pinsîr no ti bandone. E par solit il fâ, il lavorâ par esorcizâ il dolôr che tu âs dentri. Chest colp però, ni jo o soi a vore daûr di chest gjornâl come che al sucedè cuant che al mancjà pre Toni, ni Arnalt lu jere, stant che si jere ritirât par vie di une malatie viliache.
Duncje a mi, par memoreâlu cul fâ, mi reste di pensâ di cirî di mantignî la promesse ideâl che i vevi fat une volte, ven a stâi di batimi pardabon pal Friûl tal teren che i tignive lui. E che a mi no mi plâs piç.
Pal chel che al rivuarde il politic, “un grant si lu onore cu la veretât”, al diseve pre Toni, e cheste sô frase mi è restade dentri e za mi à procurât alc, che par cualchidun a son problemis, ma che par me a son medaiis “al valôr Beline”, che mi ten intor vulintîr.
Arnalt no si pues dî che al sedi un profete dal Friûl come un Marchi, un Tellini, un Marchet, un Beline. Sigûr Arnalt al jere un che si bateve pal Friûl, ma di chei leâts ancjemò al Stât talian e che al veve supât un ciert stamp dal mont. Ancje se dopo, jessint inteligjent, al veve fat i siei resonaments. Al jere un om dai siei timps: chei des tratativis, dal consociativisim e vie indevant. Cun chel, al è stât di chei che al à contribuît o otignî tant pal Friûl, ancje i presits a son di valutâ: tant par esempli vê une Universitât che si clame “di Udine” e no “del Friuli” (cun ancje parsore la Sissa di “riparazion” a Triest), che e je une feride simpri viarte.
Dut câs, tai ultims timps, al è stât sigûr chel che plui si bateve pal Friûl, miôr che tancj aromai masse cuets o congjelâts che a son ator.
E al jere un amì, Arnalt: un dai nestris. ■
Dree Venier
