ART-Â. Storiis di feminis che a resistin

Un sburt, in chest moment di crisi, no a sorevivi, ma a resisti al ven de edizion 2012 di “In file”, la rassegne invernâl di incuintris, teatri, musiche ai Colonos di Vilecjaze di Listize. L’esempli? Al ven des feminis, dal lôr “resisti” (che al è ancje il titul de manifestazion) in ogni timp e in ogni situazion. Un protagonisim, chel feminîl, ignorât a nivel di cussience coletive sedi dal pont di viste storic sedi tal sisteme sociâl di vuê, al à vût dit il diretôr artistic di “In file”, Federico Rossi.
La rassegne, tacade ai 20 di Zenâr e inmaneade de associazion culturâl Colonos cul contribût di Regjon Friûl-Vignesie Julie e Comun di Listize, cu la consulence sientifiche di Angelo Floramo, e va indevant domenie ai 12 di Fevrâr, aes 5 dopomisdì cuntun incuintri cul scritôr triestin di lenghe slovene Boris Pahor su lis resistencis linguistichis feminîls tal venteni fassist. La storie de costruzion de gnove base Usaf te caserme Dal Molin di Vicence, contrastade di un comitât che, però, tal 2009 al à scugnût rindisi, e je stade scandaiade intun laboratori teatrâl direzût di Giuliana Musso. Ce che al è vignût fûr di chê esperience al larà in sene domenie ai 19 di Fevrâr, aes 5 dopomisdì. Vinars ai 24 di Fevrâr, aes 8 e mieze di sere, si fevelarà di “Volontariis des libertâts” tal spetacul di e cun Paola Bacchetti e Massimiliano Sassi su la Resistence feminîl.
Ultin apontament, domenie ai 11 di Març, aes 5 dopomisdì, cun “Frambue di pâs/Maline Mira. Resisti tant che feminis a Srebrenica dopo 20 agns”, dulà che si contarà di feminis violentadis dilunc de vuere te vecje Jugoslavie che a àn sielt di restâ, inventantsi une microeconomie fondade su lis ricetis des nonis, stramandadis di gjenerazions. La lôr marmelade di frambue e je deventade cussì simbul straordenari di volontât resistente di continuâ a vivi. La cooperative che a àn metût sù tal imprin e dave di mangjâ a vincj fameis, cumò e da sperance di vite a cinccent di lôr. A contâ cheste esperience a saran Radmila Zarkovic e Skender Hot, cu la gjornaliste Giuliana Sgrena. Aes 3 e mieze, mostre-marcjât dai prodots de cooperative, compagnade de musiche balcan-furlane dai Madlen Troika.
Fin ai 18 di Març, si podarà visitâ te stale dai Colonos la mostre fotografiche di Danilo De Marco.
La partecipazion ai incuintris e je vierte ai socis. La cuote associative pal 2012 e je di 15 euros e e da dirit di partecipâ a gratis a dutis lis manifestazions inmaneadis de associazion culturâl Colonos vie pal an. Informazions al numar 348.1015830 o sul sît www.colonos.it ■
Erika Adami