I CLASSICS – 21. SANT JACUM, LÀ CHE AL FINÌS IL MONT

Une selezion te selezion
Se il grop dai dodis apuestui al jere za selezionât rispiet ai setantedoi dissepui, Jesù al fâs une selezion te selezion e i ‘nt sielç trê che a son presints tai moments plui impuartants de sô vite e mission. I trê a son Pieri, Jacum e Zuan. A son presints cuant che Jesù al resussite la fie di Gjaîr. Di fat, partint de rive dal mâr par lâ in cjase dal sorestant de sinagoghe, “nol lassà che nissun i les daûrji, fûr di Pieri, Jacum e Zuan, fradi di Jacum” (Mc 5, 37). Cuant che al va su la mont plui alte, là che si trasfigurarà, al cjol daûrsi Pieri, Zuan e Jacum, e ju mene “fûr di man, dome lôr” (Mc 9, 2). E dome lôr a viodin la glorie dal Signôr, contornât di Mosè e Elie e a sintin la vôs dal Pari che ju invide a scoltâ il fi de benvolence. Simpri lôr trê, “Pieri e i doi fîs di Zebedeo” (Mt 26, 37), cheste volte cun mancul onôr e pudôr, a son testemonis stracs e distrats di un dai moments plui tragjics de vite di Crist, là che la sô umanitât si mostre dute interie inte sô debolece e ribelion denant dal cjaliç spaventôs de passion. Crist ur domande di veglâ cun lui almancul une ore, a la ombre palide de lune che e jemple di malincunie chel lûc solitari plen di ulivârs. Ma lôr no rivin, par vie de flaperie umane. “Di fat i lôr vôi a colavin di sium”. Ma se i doi fîs di Zebedeo no àn judât Jesù a bevi il cjaliç de passion, cuant che e je rivade la lôr volte, a àn scugnût bevilu ancje lôr, come che ur veve profetât il mestri. Il dut al jere scomençât cuntune domande arogante fate di lôr, come che al conte Marc (10, 35-40), o de mari, come che al conte Matieu (20, 20-23). La domande e je cheste: di sentâsi un a diestre e un çampe tal gnûf ream, tant a dî di vê riservâts i prins doi puescj. Domande curiose e fastidiose, soredut in presince di altris candidâts aes incarichis. Di fat i apuestui a rugnavin che mai. Jesù al rispuint ae domande cuntune domande:”Podêso bevi il cjaliç che o stoi par bevi jo?”. Al è clarementri il cjaliç de passion, tant a dî di frontâ la muart. Dome jessint fedêi fint a la muart si pues pratindi di sentâsi tal gnûf ream, parcè che, te vision rivoluzionarie e scandalose di Crist, i prins a àn di jessi ultins e servidôrs di ducj e cun lui si fâs cariere a ledrôs rispiet ai sorestants di chest mont. Parcè che i sorestants di chest mont a fasin cariere fasintsi servî, doprant chei altris e ingrumant simpri di plui podê e ricjecis, cu la cuâl che i dissepui di Crist a puedin alçâsi ai prins puescj dome pierdint ogni podê e ricjece e la vite stesse. Come Crist, ancje i cristians a àn di rivâ ae glorie passant pal martueri. Chest a scuegnin fâlu come dissepui; rivuart po ae distribuzion dai puescj, “sentâsi ae mê diestre o ae mê çampe no soi jo che o ai di dâusal, ma al è riservât par chei che ur è stât destinât dal Pari gno”(Mt 20, 23). Nol à sens duncje pal cristian domandâ il numar di sente che i vignarà dade in cîl. Al pues e al à di domandâ invezit la gracie e la fuarce di rivâ a bevi il cjaliç de vite fin tal ultin, soredut cuant  che tu varessis dutis lis resons par butâlu lontan. La plui grande cariere par un cristian e je di fâ la volontât di Diu fintremai ae ultime dì. Il rest al è misteri e no lu rivuarde. Jacum sigurementri al è presint come testemoni de resurezion e de sense e ancje tal cenacul, biel che i apuestui, insieme cu la mari di Jesù, a spietavin preant la plenece des Pentecostis. Ma il so non al salte fûr plui in là e come di suaze te conte de presonie e de liberazion meraculose di Pieri. Al scrîf Luche: “In chel infratant, il re Erode al metè la grife su cualchidun de glesie par fiscâju. Al copà cu la spade Jacum, fradi di Zuan” (Az 12, 1-2). Chest al è sucedût sigurementri jenfri il 44 d. d. C., an de muart di Erode Agripe. I cristians che a àn inviât il cult compostelan no jerin stupits. A cognossevin ancje lôr la Bibie e a savevin che a varessin vût di rispuindi a cheste domande:”Cemût mai che un apuestul copât in Orient si cjate cui siei vues in Ocident?”. Si podeve distrigâle cul meracul, come che a àn fat in tancj altris câs. Se la cjase de Madone e je rivade fintremai a Laurêt, nissune maravee che une casselute di vues e rivàs plui in là. Invezit a àn dât dal fat une spiegazion plui origjinâl. Cuant che Jesù al è lât in cîl, ur à dât ordin ai apuestui di zirâ par dut il mont e di inscuelâ “dutis lis nazions, batiantlis tal non dal Pari e dal Fi e dal Spirtu Sant” (Mt 28, 19). La strade plui curte e plui logjiche e jere chê di dividisi e di cjapâ ognidun il so toc. Tal messâl aquileiês, ai 15 di Lui, si cjantave la secuence “In divisione apostolorum “, là che si diseve che “i dodis judiçs no son stâts dividûts di cualchidun, ma si son dividûts in plene armonie e, dividûts un par bande par dutil mont, a cjapin sù come che a fossin dutun”. Une tradizion une vore biele, che e pant la unitât te diviersitât e la diviersitât te unitât de glesie e a rivuarde la profession di fede o “Credo”. E dîs une tradizion che i apuestui, prin di dividisi, a àn decidût di fâ une sorte di struc des veretâts, chês propit essenziâls e dome chês. Metût adun il “simbul”, ognun si è cjapât un toc, di mût che, tornantsi a cjatâ e metint insieme ogni toc, e tornàs fûr te sô integritât la profession di fede o simbul. Come se metint adun ducj i predis e vignìs fûr dute la teologjie e metint adun ducj i cristians e vignìs fûr dute la santitât e un vanzeli complet. Di cheste tradizion si cjate olme in cualchi figurazion de ete di mieç dai dodis apuestui, ognidun cuntune striche, une sorte di puzzle, dal Credo. Jacum al à cjapade la strade dal Ocident e al è rivât in Spagne, al confin ocidentâl dal mont; Bartolomeo in Persie; Andree in Grecie, a Patràs; Tomâs inte part meridionâl de Indie. A Rome, a son rivâts i doi caporions, Pieri e Pauli. Ma intant a Jerusalem i judeus a fasevin furôrs cu la lôr dutrine e nissun nol rivave a tignîur a cjâf. I àn mandât a dî se al faseve la gracie di tornâ a Jerusalem almancul par un trat di timp, par viodi se al rivave a fâur gambiâ idee o a stropâur la bocje. Lui al à ubidît e al è tornât ae risultive de religjon cristiane. Al à tacât a predicjâur ai judeus cun tante unzion e fortune che il re si è spaventât e, intun colp di pôre e di gjelosie, i à fat cjonçâ il cjâf. La tradizion e conte che il boie, incaricât di taiâi il cjâf, no si è sintût, parcè che Jacum al jere masse sant par mertâ chê fin. Alore il re i à dit che, se no i cjonçave il cjâf subitementri, alvarès pierdût ancje il so. E lui si è inzenoglât dongje dal Sante cussì un boie cun mancul scrupui ju à distrigâts ducj i doi. Dut chest al è figurât tes storiis di Sant Jacum.
Muart l’apuestul, i dissepui a àn dit:”Isal just tignî il so cuarp cun nô, dal moment che il so cûr al jere venti sù pe Spagne?”. Di li la decision di meti intune barcje il cuarp dal apuestul e chei dai dissepui Atanasi e Teodôr, come che al è sculpît daûr dal altâr grant. Al va dit che ancje Marie Madalene, cuntune barcjute, e je rivade fintremai a Marsilie. Però jê e jere in vite, cu la cuâl che la barcjute cui trê cuarps e je stade parade indenant e indreçade dal agnul dal Signôr, che al vegle sui muarts. Culì e finìs la storie di Jacum e a scomence la venerazion e il pelegrinaç.
pre Antoni Beline