Dirit ae lenghe, dirit ae istruzion, presince des istituzion scolastichis tai paîs, tutele des minorancis e sens de autonomie regjonâl a son cuistions di atualitât ancje te zone de provincie di Udin là che si cjate la minorance slovene. L’argoment al jere za saltât fûr intant de cunvigne sui dîs agns de Leç statâl 38 dal 2001 su la tutele dai slovens, che si è davuelt ai 2 di Avrîl stâts a Malborghet, cuant che la dirigjente dal Istitût comprensîf bilengâl di Sant Pieri dai Sclavons, Živa Gruden, e veve palesât la sô preocupazion su cemût che chel pôc di insegnament dal sloven ta chês altris scuelis, di Resie aes Vals dal Nadison, al sarès in pericul par vie des cussì clamadis razionalizazions previodudis de “Riforme Gelmini”. Pôcs dîs plui tart, ai 7, il Consei comunâl di Taipane al à deliberât ae unanimitât la richieste che e vegni vierte tal paîs la scuele materne e elementâr bilengâl e al à fat compagn, a grande maiorance e dome cuntun vôt cuintri e doi astignûts, il Consei comunâl di Lusevare ai 30 di Avrîl. Cumò la discussion e tocje i timps e lis modalitâts – une scuele par comun o une par ducj i doi? – par passâ pardabon des peraulis ai fats.
Marco Stolfo
ATUALITÂT – Ancje in Provincie di Udin si domandin gnovis scuelis bilengâls
Marco Stolfo
