FURLANS, DIGJITAIT FURLAN – LICÔF. La Rêt e la identitât teritoriâl

Cun cuâl stîl lis coletivitâts sono a stâ tai lôr teritoris? L’argoment culì in bal al è chel de partecipazion spontanie des comunitâts umanis ae costruzion de proprie identitât massmediatiche, e no sin daûr a fevelâ dome di imagjinari. La rapresentazion mediatiche che e ven fûr de opinion publiche locâl e da visibilitât a tematichis une vore concretis, tant che par esempli la organizazion logjistiche dal tiessût urban, la viabilitât o il moviment di marcjanziis e di personis. O pûr, al rivuarde il mont de informazion e de conversazion tra Ents locâi e citadins, se o provìn a resonâ di plateformis web istituzionâi pe partecipazion publiche de citadinance a formis di progjetazion sociâl condividude e colaborative.
COMUNICAZION COMUNITARIE_ Il fâ comunicatîf de comunitât locâl – o ben l’insiemi dai discors e des posizions dai individuis singui e ancje dai atôrs sociâi tant che grups o istituzions – al veicole par esempli lis descrizions fisichis o lis carateristichis concretis di un ambient rurâl o urban, lis valutazions ancje estetichis sul paisaç o su lis filieris di distribuzion economichis e produtivis locâls, e a contribuissin cu la lôr polivocalitât a piturâ la imagjin dinamiche di chel teritori, par cemût che cheste e ven sù de continue conversazion sociâl. Si trate ciert di alc che al è esistût di simpri, ma che vuê al risulte potenziât e fat plui visibil in graciis dal web moderni, bon di dâ acet aes vôs di ducj.
TAI ULTINS DOI SECUI_ Tal Votcent la identitât furlane, par cemût che cheste e rivave a cjatâ rapresentazion di se te opinion publiche, e viveve intes arts figurativis, inte leterature o intal teatri popolâr. Il Nûfcent, a chescj lûcs di espression identitarie al à zontât i massmedia tant che i gjornâi cuotidians, la radio e la television: dilunc dal secul passât e je cressude dal sigûr la difusion des informazions e la circolazion dai ponts di viste, ma la produzion culturâl mediatiche e restave dut câs risiervade a pôcs centris economics governatîfs o comerciâi.
Chel che fin îr nol podeve esisti in maniere materiâl – vâl a dî, permeti a un cualsisei di stampâ il so  gjornâl o di inviâ il so canâl televisîf –, vuê al è deventât prassi comune pal citadin singul, in graciis des gnovis tecnologjiis digjitâls.
CIRINTNUS TAL WEB_ Tornant a concentrâ la nestre atenzion sul jessi a stâ in Rêt di bande des coletivitâts umanis, o provìn a pensâ ai prins cent risultâts che il motôr di ricercje di Google al da  cirint il tiermin “Friûl”: o otignìn une sorte di fotografie dinamiche e ganzante dal nestri teritori. Dome cualchidune di chestis vôs e sarà espression di une comunicazion istituzionâl progjetade e publicade, mentri che altris, tant plui numerosis, a vignaran fûr dai resonaments e dai documents multimediâi publicâts di cualchi blog impuartant de zone, dai forum di discussion, des conversazions che a son su cualchi sociâl network, dai sîts comerciâi che a fasin dal colegament al teritori un lôr pont di fuarce intal marketing, di testadis gjornalistichis che a rifletin i acjadiments locâi.
LA IDENTITÂT DIGJITÂL_ Il Friûl ai voi dal mont al è chest. Un gjaponês al compre une butilie di vin, al lei su la etichete “Friûl”, al decît di indagâ su Internet, al domande a Google di contâi alc de nestre Regjon. La sô opinion complessive e dipendarà dai percors di narazion che il motôr di ricercje al fâs praticabii, tal mostrâ lûcs e narazions, la personalitât e la identitât mediatiche che e ven sù dal teritori.
L’insiemi des narazions di un teritori al costituìs la sô cjarte di identitât. E je une sorte di scriture corâl di storiis (e di Storie) parsore une gjeografie, dulà che lis peraulis che chê comunitât e dopre par contâsi, lis peraulis di ognidun di nô, a puedin cumò – in graciis de tecnologjie web – interagjî cu lis mapis satelitârs e cui telefons celulârs, espandisi e cjapâ cuarp e fuarce dentri i blogs e i sociâl networks, alimentâ centenârs o miârs di flus di conversazion, dulà che prime o jerin costrets a contentâsi di pocjis vôs.
Giorgio Jannis