MEDIA – E-MARILENGHE. On line il gnûf sît par furlan de Provincie di Udin

Ae direzion http://furlan.provincia.udine.it la Provincie di Udin e à screât in Otubar lis sôs pagjinis par furlan. L’ent al à metût a disposizion dai citadins un gnûf mieç di comunicazion istituzionâl dut in marilenghe, i contignûts a van de storie dal Friûl ae comunicazion, de leterature a lis tradizions, fintremai a lis manifestazions storichis, cuntun voli ae scuele.
UN SÎT DOME PAL FURLAN_ La sielte de Provincie no je stade chê di voltâ une par une lis stessis pagjinis de version par talian in lenghe furlane, in maniere di vê dôs versions a spieli dal midiesim sît (opzion plui faturose ma plui auspicabile), ma si à volût risiervâ une sezion particolâr ai tescj in marilenghe.
Une note positive e je chê de sielte grafiche e de impagjinazion, che e je compagne in dut e par dut di chê de version par talian. Cheste sielte, che e podarès someâ fate par economie, e à l’efiet di no dâ la idee di une sezion «speciâl» metude in pîts par une minorance di citadins.
Par cumò i contignûts no son ancjemò numerôs, però o sperìn che la sezion e vedi un biel disvilup tal avignî.
PORDENON E GURIZE_ Nol è il prin pas che la Provincie di Udin e fâs in cheste direzion, ma a ce pont sono chês altris provinciis furlanis dal F-VJ?
Chê di Gurize e à cjapade la strade di vê trê versions simetrichis, par talian, furlan e sloven, ancje se a son une vore di pagjinis vuedis tes versions des lenghis minorizadis.
Il sît de Provincie di Pordenon al limite i contignûts in marilenghe ae sezion dal Sportel linguistic, ven a stâi une pagjine di gnovis e un archivi di filmâts dal TG par furlan metût sù dal Ent cui fonts de leç 482.
Michele Calligaris