i R.Esistence in Dub a ritirin il premi al Liet Festival

Ciribiribin vuê e je fieste!
E al è propit il câs di fiestezâ parcè che pe prime volte al è furlan il premi dal public al Liet International, il festival european di riferiment de musiche in lenghe di minorance, che si è davuelt ai 27 di Novembar a Lortient/An Oriant in Bretagne, France. Dulà che no son rivâts artiscj nostrans di nivel come Lino Straulino e i Carnicats (classificâts al tierç puest, un intal 2009 e chei altris intal 2008), je àn fate i R.Esistence in Dub. Kefia, mimetiche e felpis cu la cape, al ritmi di buine musiche electro dub reggae, i cuatri zovins musiciscj de provincie di Udin – za vincidôrs dal vôt popolâr ae kermesse Suns 2010 – a àn concuistât ancje la platee europeane cul toc «Fieste», une cjançon che e fevele di mancjance di spazis di incuintri pai zovins furlans, ma che e fevele ancje di emozions: »Puartimi dulà che musiche e amôr si fondin. Puartimi dulà che lis emozions tal cûr si confondin».
PUBLIC ENTUSIAST IN SALE E SUL WEB_ «Cheste no je dome la vitorie dal grup, ma e je la vitorie di une linie di pinsîr», al à comentât Mauro Tubetti, in art Dj Tubet, «ven a stâi chê di puartâ l’ûs di une lenghe di minorance intal cjamp inovatîf de musiche sperimentâl, in maniere che e sedi veicul pai plui zovins, fondint tal stes timp elements classics de tradizion popolâr (il ritornel de cjançon al è un regâl ae celebre vilote ‘Ciribiribin, doman e je fieste’, ndr), par un messaç che al sedi bon di rivâ a ducj». Al è stât propit il public de sale, dulà che i R.Esistence in Dub a àn strabatût i coleghis europeans, a premiâ la cumbinazion jenfri tradizion e sperimentazion: «Il biel al è stât viodi i zovins che a ‘pogavin’ (tal slang dai zovins, sburtâsi un cun chel altri intant che si bale, ndr) indenant, e juste daûr lis fameis che a balavin danzis celtichis», al à contât ancjemò Tubet. Colp decisîf pe vitorie, il vôt dal public a cjase (che al contave pal 25% dai ponts totâi): une svintule di ‘clics’ online dal Friûl e à fat il bot, puartant tal ultin a cjâf de classifiche i R.Esistence in Dub, che no fermin di ringraziâ ducj chei che ai 27 di Novembar si son metûts denant dal computer e a àn sigurât ae Patrie tal forest il prin puest sul podi.
CHEI ALTRIS IN GARE_ Il premi de jurie a e lât invezit ai Orka, musiciscj des Isulis Faroe che a sunin cun struments inventâts e costruîts di lôr stes. I grups Xera (Asturie) seconts e Equal Souls (Frisie) a son rivâts tierçs. Sul palc dal Liet Festival 2010 si sfidavin undis grups di dute Europe (Isulis  Faroe, Galizie, Corsiche, Karelia (Russie), Scozie, Asturie, Svezie, Frisie, Bretagne, Friûl e Irlande), in rapresentance di ancjetantis minorancis linguistichis. La vitorie dai R.Esistence in Dub no podeve dâ miôr benvignût ae prossime edizion de rassegne, che tal 2011 si davuelzarà propit in Friûl. Biel che Udin si prepare a trasformâsi te capitâl europeane des minorancis linguistichis, ciribiribin, chi intant si fâs fieste!

Natascia Gargano